Сумар дня на 27. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 27. грудня/децембра 2021 р.

Роботы при “сандеччанці” зачнут ся в 2026 році

В Малопольскым Воєвідскым Уряді в Кракові одбыла ся чергова стріча соймовой ґрупы м.ін. в справі будовы дорогы скорого руху з Бжеска до Нового Санча і дале до границі державы в Мушынці, тзв. «сандеччанкы». Бесідували о найблизшых перспективах тыкаючых інвестициі, гармоноґрамах прац ци можливых загорожынях. Важным пунктом стрічы было і середовискове рішыня Реґіональной Дирекциі Охороны Середовиска в Кракові. Представлено конкретны терміны – роботы при дорозі зачнут ся в 2026 році. В Реґіональній Дирекциі Охороны Середовиска фурт анализуваны сут три можливы вариянты трасы. Будова дорогы являт ся барз важном інвестицийом для полудньовой Малопольщы. Сандеччанка мала бы ся причынити до зліпшыня дороговой комунікациі і медже Західньом Лемковином і Краковом. Дорога была вписана до Проґраму Будовы Державных Доріг уж в 2017 р., коли зарезервувано на тоту ціль 1,8 млд злотых. В минулым році власти рішыли єднак збільшыти дофінансуваня на будову дорогы до близко 3,2 млд злотых. Будова дорогы мала бы быти завершена в 2029 році.

Нова песа театральной ґрупы Племя

Вчера, 26. грудня/децембра, в церкви св. Параскєвы в Устю Рускым одбыла ся премєра новой пєсы Меджепоколіньовой театральной ґрупы Племя – «Вертеп» в режысериі Мариюша Лясковского подля сценария Монікы Бабулі. Так як і інчы спектаклі той ґрупы, «Вертеп» єст нетиповый, находят бо ся в ним одкликаня до Низкого Бескіду. За лідерком ґрупы Моніком Бабульом, пєса єст добром нагодом, жебы вказати актуальны локальны і дакус дальшы ґеоґрафічно темы. В «Вертепі» мож почути музику ци коляды в аранжациі Мирослава Боґоня. Спектакль буде граный днес о 16.00 і 18.00 год. в церкви св. Параскєвы в Устю Рускым. Пак пєсу буде мож обзерати іщы 8 і 9. січня/януара будучого рока. Чысло місц ограничене.

Завершена будова Singletrack в Ґорлицях

Ґорлицка біциґльова інфраструктура збогатила ся о новый обєкт. На схылі Цмунтерной Горы завершыла ся долгождана будова біциґльовой стежкы Singletrack. Будова специяльной стежкы была єдным з проєктів, якы перемогли в голосуваню Громадяньского Буджету Ґорлиц в 2019 році. Кошт реализациі проєкту то близко 230 тисячів злотых. Для любителів ізды біциґльом і адреналіны зрыхтуваны были три вариянты трасы о ріжній ступени заавансуваня: єдна підіздова і дві зъіздовы. Разом стежкы чыслят понад 1680 м. На роверовых трасах находят ся специяльны прешкоды, такы як деревяны лавкы ци насыпы з землі або каміня. На початку підіздовой трасы был тіж зрыхтуваный стартово-выпочынковый пляц, з лавками і стояками на біциґлі.

Колекта на печатаня першой лемківской кухарской книжкы

Фурт тырват соспільна колекта на печатаня першой лемківской кухарской книжкы. В публикациі найде ся аж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej. Кампанія потырват до кінця грудня/децембра тр.

джерело фотоґрафіі: dk.75.pl