Сумар дня на 20. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 20. грудня/децембра 2021 р.

Апель проти принятой поправці до буджетового закону 

Польскій сойм принял буджетовый закон на будучый рік. Взяли в ним до увагы поправку посланця Януша Ковальского, тыкаючу зменшыня о близко 40 млн злотых субвенциі направленой на вчыня меншыновых языків і вчыня реґіонального языка в школах. Проти зміні выповіли ся уж м.ін. меншынова сторона Спільной Комісиі Уряду та Нацийональных і Етнічных Меншын та академіцкє середовиско. Подля них поправка барз неґативно влине на реализацию задач маючых на ціли підтримуваня нацийональной, етнічной і языковой достоменности польскых громадян, котры належат до меншын, та в результаті ограничыт можливости реализуваня прав признаных ґрупам выміненым в Законі о нацийональных і етнічных меншынях та реґіональным языку, в польской Конституциі, в Европейскій Карті Реґіональных або Меншыновых Языків і інчых правных актах тыкаючых меншыновых проблемів, прав чловека і громадяньскых прав. Підкрисляют, же неґативны консеквенциі такых дискримінацийных діянь будут далеко ідучы. Апелюют до Сойму Польской Республикы о одшмаріня принятой поправкы.

В Замборі зас будут рыхтувати педаґоґів до вчыня по русиньскы

Як інформувала аґентура Рутенпрес, делеґация Нацийонального Совіту в Сербіі была з візитом на Падаґоґічным Факультеті в Замборі, де зас будут приготовлювати педаґоґів до вчыня в русиньскым языку. Така практика діяла там перше до 2006 рока. На стрічы за Русинів были участны м.ін. предсідателька Секциі про урядне хоснуваня языка і писма і секретар Міністерства про людскы права, права меншын і социяльный діалоґ Олена Папуґа, секретар Нацийонального совіту Русинів Таня Арва Планчак, членкыня Секциі про освіту при Нацийональным Совіті Люниця Няради. Русиньску делеґацию принял декан Саша Маркович. Русины на стрічы представили потребы свойой меншыны в справі учытельскых кадр. Добесідувана была і можливіст для русиньскых студентів збогатити дипломы о пару курсів з методикы, русиньского языка і русиньской літературы, на основі чого будут кваліфікуваны робити не лем в сербскых, але і в русиньскых школах і навчальных інституциях.

Новый тротуар при повітовій дорозі Ропа – Границя Державы

Завершена будова тротуару при повітовій дорозі Ропа – Высова – Бліхнарка – Границя Державы. Выконаня близко 500 метрів тротуару тырвало два місяці і коштувало понад 918 тис. злотых, з чого 300 тис. злотых походило з буджету ґміны Ропа, а решта з Ґорлицкого Повіту. Як бесідує війт ґміны Ропа Кароль Ґурскій, завдякы будові тротуару на рухливым одтинку повітовой дорогы поправит ся безпека і пішых, і ведучых автами. В плянах сут дальшы того рода інвестициі.

Тяжкы условія на гірскых путях

Працівникы Бєщадского Нацийонального Парку припоминают в туристичным комунікаті о тяжкых условіях на гірскых шляках. Міцны опады снігу закрывают выдоптаны перше пути. Змінны температуры спричыняют, же на шляках робит ся лед. Обовязує перша ступін лявиновой загорозы. Вандрівкы додатково утруднят сильный вітер, якій дує до 60 км/г. Працівникы Парку рекомендуют вандруючым добрі заплянувати трасу, так жебы не была за тяжка для іх кондицийных можливости. На прогульку конечно треба взяти одповіднє облечыня, тепле питя, набитый телефон і додатково джерело енерґіі, лятарку і ракы. Просят тіж зголошувати вандрівкы до локальной ґрупы Гірской Охотничой Ратівничой Стражы GOPR.