Сумар дня на 15. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 15. грудня/децембра 2021 р.

Форум Людскых Прав – Сербія 2021

В минулу пятницю, 10. грудня/децембра, в Палаци Сербіі в Бельграді прошол Форум Людскых Прав – Сербія 2021, в рамках торжествуваня Медженародного Дня Людскых Прав. Подію одкрыла міністерка про людскы права, права меншын і социяльный діалоґ Ґордана Чоміч, котра припомнула, што єдным з першых засідань новоформуваного міністерства было засіданя з представниками нацийональных совітів, орґанів меншыновых самосправ. Тоты одбыли ся кінцьом листопада/новембра минулого рока і од того часу зреализувано вельо ініциятив в обшыри ситуациі меншын в Сербіі. На пятницьовій подіі проходили і три панельовы дискусиі присвячены темам людскых і меншыновых прав. В дискусиях брала участ Олена Папуґа, котра є державным секретарьом Міністерства про людскы права, права меншын і социяльный діалоґ, а при тым русиньска активістка. На засіданю были присутны і чысленны представникы світовых і европейскых інституций, а тіж председа Нацийонального Совіту Русинів Борислав Сакач.

Дотация на квад для Охотничой Протиогньовой Стражы в Вапенным

Війт Ґміны Санкова Малґожата Малух одобрала в понедільок, 13. грудня/децембра, з рук Малопольского Воєводы Лукаша Кміты символичный чек на квоту 40 тис. зл, якій є деклярацийом дотациі признаной з середків резервы буджету державы, жебы купити поізд типу квад (quad) для потреб Охотничой Протиогньовой Стражы в Вапенным. Стріча прошла в Малопольскым Воєвідскым Уряді при присутности інчых війтів з Малопольщы, котры тіж отримали промесы на реализацию публичных задач з середків резервы буджету державы. Цілковитый кошт закупу квада то 75 тис. зл. Його закупліня має звекшыти протиогньову і ратовничу безпеку ґміны Санкова.

Новый розклад ізды потягів

Од той неділі вошол в жытя новый розклад ізды потягів, якій буде обовязувал черговых 12 місяців. Некотры воєвідства зміцняют сітку своіх получынь, інчы з некотрых резиґнуют. Курсуючый дотепер штоденно потяг Ветліна з Загіря до Кракова буде ходил в вікенды на выдолженій трасі Загіря-Клодзко, значыт од Бєщадів аж на Нижній Шлеск. Потяг буде затримувал ся м.ін. на стациі Ґорлиці-Заґужаны. Приспішены о піл годины або о годину сут штоденны одізды потягів PKP Intercity, якы курсуют през Ясло, Коросно, Санок. Окрем іншого – потяг, котрым з Ґдыні ци Варшавы мож через Катовиці доіхати аж до Відня, має інчу катеґорию на польскым одтинку – ІЦ (IC) в місце ЕІЦ (EIC), што безпосередньо перекладат ся на ціну білету.

Діяня в обшыри волонтерства

В Ліґници представникы польковицкого і ліґницкого самоурядів рішали о спільных діянях в обшыри волонтерства. В часі подіі оголосили лавреатів конкурсу Волонтер 2021 Рока. Деклярацию Спілпрацы урядникы підписали в ліґницкій Рыцарскій Академіі. Підписы зложыли президент міста Ліґниця Тадеуш Кшаковскій та бургомайстер Польковиц Лукаш Пузнєцкій. Вєдно з нима Деклярацию підписали особы одповідальны в обох самоурядах за таку діяльніст: в Польковицях Боґуслав Ґодлевскій, а в Ліґници Якуб Належный. Сиґнатарі спільні задеклярували продолжаня діянь в обшыри волонтерства. Серед выріжненых в рамках конкурсу Волонтер 2021 Рока нашли ся м.ін. Магдалина Рембіш і Пьотр Шыманьскій.