Польскій уряд влады рішучо проти ненависти з причыны нацийональной приналежности

Польскій уряд влады рішучо є проти всякым проявам антисемітизму і ненависти з причыны нацийональной, реліґійной або етнічной приналежности. Таку інформацию члены соймовой Комісиі Нацийональных і Етнічных Меншын почули 30. листопада/новембра од підсекретаря стану в Міністерстві Внутрішніх Справ і Адміністрациі, Блажея Побожого.

Як раз антисемітскы ексцесы сперед трьох тыжнів были головном темом посліднього засіданя комісиі. Припомнийме, што в ден польского Свята Незалежности, 11. листопада/новембра 2021 р., в Калішы одбыл ся ганебный марш, участникы котрого возносили антисемітскы госла.

На остатнім засіданю комісия розсмотрила інформацию од представників Ґенерального Прокуратора, Міністра Внутрнішх Справ і Адміністрациі, Головного Коменданта Поліциі та Президента Міста Каліша.

Репрезентантка Ґенрального Прокуратора ствердила, што прокуратура діє без опізнінь, згідно з обовязуючым правом, а єй діяня были уж оцінены судом, якій рішыл арештувати підозреных.

Підсекретар Побожый, якій репрезентує міністерство і під опіком якого находят ся нацийональны і етнічны меншыны в Польщы, дал ґаранцию того, же Польща є проти ненависти. «Польскій уряд рішучо осуджат всякы антисемітскы захованя і вшелеякы проявы ненависти з причыны нацийональной, реліґійной або етнічной приналежности. Не може быти згоды на ганебны захованя» – деклярувал.

На засіданю присутны были представникы жыдівской меншыны. 11. листопада/новембра ґрупа нацийоналистів в часі маршу перше кричала антисемітскы госла, а пак на Головным Рынку в Калішы спалила текст Калішского Статуту – толеранцийной привілегіі для Жыдів, выданой калішскым князьом Болеславом Побожным в 1264 р.

Трьом орґанізаторам маршу горозит до 5 років вязниці, за публичне кликаня до ненависти і зневагы ґрупы люди з причыны іх нацийональной приналежности і віроісповіданя, та публичного підбуряня до злочыну проти такым особам.