Сумар дня на 1. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 1. грудня/децембра 2021 р.

Векше вынагороджыня для Старосты Ґорлицкого Повіту

25. жолтня/октобра прошла ХХХІ сесия Рады Ґорлицкого Повіту. Засіданя проходило онляйн. Єдным з першых пунктів стрічы было приняти Проґрам спілпрацы Ґорлицкого Повіту з позаурядовыма орґанізациями і інчыма підметами, якы ведут діяльніст публичного хосну на 2022 рік. Головным цільом того проґраму є звекшыти громадяньскє влияня на креуваня соспільной політикы через будуваня партнерства медже публичном адміністрацийом і позаурядовыма орґанізациями. Дале, Ядвіґа Вуйтович, директорка Повітовой Санітарно-Епідемійолоґічной Стациі в Ґорлицях і Мариян Свєж, директор Специялистичного Шпыталя в Ґорлицях подали інформациі тыкаючы актуальной епідемічной ситуациі в повіті. Поінформували, што ситуация є тяжка, і погіршат ся з огляду на чысло осіб, што не приняли вакцины. В дальшым порядку засіданя было приняти плян роботы Рады на 2022 рік, рішыти высокіст вынагороджыня Старосты та рішыти зміны в Буджетовій Резолюциі Ґорлицкого Повіту на 2021 рік та зміны Вельолітньой Фінансовой Проґнозы Ґорлицкого Повіту.

Выремонтували стежку здоровля. Насадят тисячы новых дерев

В Польковицях выремонтували стежку здоровля. На пікніковым пляци замонтували нове ґратя, м.ін. лавкы, альтаны, кошы на смітя ци рушты. Входячых на пляц витат велика таблиця з реґуляміном і важным переказом, бесідуючым про дбаня о тото місце і прятаня по собі. Кошт ремонту польковицкой стежкы здоровля то близко 140 тис. зл. Неодолга змінят ся і обшыри находячы ся за самом стежком. Появит ся гын до парунадцетьох тисячів новых дерев. Є то рекомпенсата за вытинку парусот хворых сосен, про што рішыло і провело любіньскє надлісництво. Як подали, вытинка была необхідна, жебы сохранити вмераючый ліс од наслідств пятлітньой сушы і выелімінувати загорозу зваляня ся дерев. Надлісництво Любін заповіло, што на яр будучого рока запросит жытелів Польковиц до едукацийно-соспільной акциі, котрой основом буде саджыня дерев на тым терені. Новы дерева мают быти одпорнійшы на шкідникы і сушы.

Набір до експертскых ґруп опініюючых внескы

Зачал ся набір кандидатів на членів конкурсовых комісий, якы підперают Малопольскє Воєвідство м.ін. в розділяню дотаций для самоурядовых орґанізаций. Головном задачом експертскых ґруп буде репрезентувати позаурядовы орґанізациі в опініюваню оферт, якы складаны сут в одкрытых конкурсах оферт на реализацию публичных задач Малопольского Воєвідства. Кандидатів можут зголошувати позаурядовы орґанізациі, стоваришыня єдинц самоурядів, кооперативы і інчы. Формуляр і дрібницьовы вымаганя доступны сут на сайті malopolska.pl. Зголошувати мож ся до 17. грудня/децембра.

В ПСК інвестуют і ремонтуют

Пряшівскій Самосправный Край розділил того рока медже 32 підметы веце як 1,1 млн евро на реализацию задач з ґрантового проґраму «Вызва про реґіон». В попередніх місяцях підпорены были реконструкциі ци будова спортовиск. Змодернізувана была напримір спортова галя в Старій Любовни, в селі Шаришскє Ястрабя был зреконструуваный і добудуваный ареал футбольового боіска. Кінцьом жолтня/октобра зачали реализувати вкрытя стріхом ледового пляцу во Свиднику. Роботы гын плянуют скінчыти о девят місяців.

Ден Памяти Жертв Выпадків в Роботі в KGHM

29. листопада/новембра в Любіні проходило празднуваня Дня Памяти Жертв Выпадків в Роботі в KGHM. Є то спомин найвекшой в істориі компаніі траґедиі сперед пятьох років. В копальни «Рудна» згынуло товды вісем копальників, а вельох было раненых. Протягом цілого дня ріжны делеґациі складали вязкы квітя при памятнику, якій находит ся при сідибі Централі Польской Міди в Любіні, а котрый вознесли рік по траґічных подіях з 2016 рока.