Сумар дня на 30. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 30. листопада/новембра 2021 р.

То не конец ремонтів на Любовняньскым граді

Як інформує аґентура ТАSR, музей в Старій Любовни, котрый справує Любовняньскій град, отримал 850 тис. евро дофінансуваня на реновацию пілнічно-східньой стіны, котра єст в барз злым стані. Як повіл директор музею Далібор Мікулик, в плянах єст тіж перша археолоґічна експозиция. Долгы рокы ведены были досліджыня войсковых касарен, а найдены в них експонаты будут презентуваны при помочы технолоґіі ХІХ столітя. Частю проєкту єст тіж медже інчыма презентация ріжного рода ремесла ци побудуваня загороды сокольників. Проєктова документация была уж затверджена Памятковым Урядом Словацкой Республикы, зреализували ся і вшыткы потрібны до того баданя. З нагоды реализациі проєкту днес, 30. листопада/новембра, одбыват ся онляйнова конференция. Партнером музею в Старій Любовни є в тій справі музей в норвежскым місті Вардо. Плянуваный термін полной реализациі проєкту, разом з так званыма мягкыма активностями, то груден/децембер 2024 р.

Потягом до гірскых курортів

PKP Польскы Желізницьовы Леніі заповіли ремонт на одтинку зо Стружів до Ґрибова. Головном цілю плянуваных на 2022 рік, дальшых прац при гірскых одтинках желізницьовой леніі з Тарнова до Лелюхова єст зробити атракцийнійшыма подорожы до такых місцевости, як Жеґєстів, Мушына ци Крениця. Має быти скорше, але і безпечнійше. Уж тепер зачали ся працы на єдным з торів, в грудни/децембрі рушат тіж і на другым, а од нового рока будут они комплексовы. Окрем выміны торів, роботы обнимают тіж модернізацию семох інчых желізницьово-дороговых переіздів. Кошт інвестициі то близко 17 млн зл.

Книжка «Світ під Кычером» нагороджена в конкурсі Ліґницка Книжка Рока 2020

25. листопада/новембра в Рыцарскій Академіі в Ліґници прошол фінал Ліґницкой Книжкы Рока 2020. Конкурсова капітула спосеред 34 наголовків выданых минулого рока номінувала 5. Нагороджено дві позициі, в тым книжку «Світ під Кычером», редактором якой єст Юрий Стариньскій, ведучый Лемківского Ансамблю Пісні і Танця «Кычера». Цілю конкурсу єст нагородити та промувати книжкы звязаны з Ліґницьом, написаны жытелями Ліґниці або выданы в тым місті. При выборі номінаций капітула смотрит м.ін. на ґрафічну страну, тему, ориґінальніст ци тото, як дана публикация влинула на жытелів міста, реґіону ци державы. Конкурс орґанізуваный єст Музейом Міди в Ліґници та Ліґницком Публичном Бібліотеком.

«Пралісы Словациі» – наступный крок в страну охороны природы на Словациі

На конец дашто для любителів еколоґіі. 3. листопада/новембра уряд Словациі схвалил постанову, в котрій узнал 76 лісовых обєктів на Словациі резерватами природы під головном назвом «Пралісы Словациі». То коло 6,5 тис. гектарів лісів, в котрых згідні зо словацкым законодавством введено тзв. 5 ступін охороны (найвысшу, што означат стислу охорону і ограниченый вступ). Обєкты сут розміщены по цілій словацкій териториі, особливо дуже єст іх в Низкых Татрах і Великій Фатрі. Постанова войде в жытя 1. грудня/децембра тр. Рішыня єст першым кроком в страну вводжыня Европейской Стратеґіі Охороны Біолоґічной Ріжности 2030 «Привернути природу до нашого жытя», котрой цілю єст хороити пралісы.