«Слово» – 23-та неділя по Сошествії Святого Духа – неділя, 9.00 год.

Ісус Хрістос приходить зо своїма учениками до ґерґесіньского края. Там його стрітив чоловік, котрый быв овладнутый нечістыма духами. Было їх много – леґіон.

Кедь увидів Ісуса, скричав, што тобі до нас, Ісусе, Сыну жывого Бога? Прошу тя, не муч ня. Ту можеме видіти, же злый дух не може знести присутность Хріста. Так і чоловік, котрый є зануреный до рабства гріха, роскоші і страсти, кричіть, што тобі до мене? Утікать од Церькви, од молитвы, од сповіді. Не хоче думати на вічность, на небо, на пекло. Діавол його тягне лем до того земного. Є про нього муков слухати Божы наказаня і заповіді. А тыж указує, же будь є чоловік на стророні Бога, стороні добра, або ся рішать на сторону зла, то є діавола.

Ісус выганять демонів, котры вошли до стада свинь і потопили ся в морі. Народ ся зышов посмотрити, што ся стало. Кедь увиділи Ісуса, просили, жебы одышов із їх края. А Ісус насів до лодькы і одплавив ся інде. Народ приходить видіти чудесне діло, але смотрять лем тілесно. Не радують ся з выздравліня того чоловіка. Они смотрять лем на страту, котру зазнали через страту свинь.

Так реаґують многы. Боять ся утратити, опустити выходжены стежкы свого жывота а выкрочіти десь до незнама. Так посылають Ісуса гет, жебы їм не была іщі векша шкода. Ісус приніс покій тым жытелям. Они то не прияли.

Ісус то обіцять і нам. Приходить нас ослободити з того рабства діавола. А кілько кричіть, што тя до нас? Або ідь од нас. Дай нам спокій. Хочеме сі жыти свій жывот. Але тото одмітнутя Хріста не значіть спокійный і радостный жывот, але правый опак.

Прото не наслідуйме приклад тых людей, але повіджме вєдно зо жытелями самарії: Остань із нами. Слава Ісусу Хрісту!

В неділю, 28. новембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. новембра о 12.00 год. і 29. новмембра о 2.00 год. за русиньскым часом.