«Слово» – Праздник Архангела Михаіла – неділя, 9.00 год.

В днешній день празднуєме память св. Архангела Михаіла і прочіх безплотных Сил. У сімболі віры ся молиме: видимых же всіх, і невидимых…

Тым выражаме нашу віру в Бога, єдиного Сотворителя видимого світа і світа невидимого. До невидимого світа належали ангелы. Спочатку вшыткы ангелы были добрыма. Бо вшытко, што Бог сотворив, было добрым. Но так, як першы люде, были выставлены выпробованю – не будеш їсти зо строму познаня добра і зла. Тото выпробованя мало указати, ці чоловік буде послухняный Божій волі і його заповідям.

І ангелы подля учіня отців Церькви мали перейти выпробованьом. Было їм указане Втіліня Божого Сына а мали ся му поклонити. Но найкрасшый із ангелів званый Луціфер – світлоноситель, одповів: Не буду ся кланяти, не буду служыти. То є першый бунт розумной бытости проти свойого Сотворителя. А стягнув за собов і далшых ангелів.

Проти них выступив св. Архангел Михаіл, котрого імя значіть – хто як Бог. Тыма словами вєдно із добрима ангелами перемогли Луціфера і його общників і звергли їх із неба. З них ся стали демоны, діаволы, котры самы одсуджены до вічной пропасти, старають ся там стягнути і людей.

Уж од початку через ідолослужіня ведуть людей до того, жебы не Богу, але їм оддавати честь. А тото роблять дотеперь. Покушають чоловіка, жебы не слухав Господні заповіді, не жыв подля його слова, выберав собі слободу жыти як хоче. Жебы ся кланяв ідолу тіла – силы, красоты, роскоші. Ідолу пінязь… А Бог нам посылать на поміч святых ангелів, котры нас ведуть ку добру. Но мы маме слободну волю а можеме рішати, на котру строну ся придаме.

Най і днешній праздник нам припоминать, же рішіня на строну Богу значіть жывот а на сторону зла значіть смерть Слава Ісусу Хрісту!

В неділю, 21. новембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. новембра о 12.00 год. і 22. новмембра о 2.00 год. за русиньскым часом.