Сумар дня на 18. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2021 р.

Петров одкликаный, але спомнул на Русинів

В понедільок, 15. листопада/новембра, Закарпатска Областна Рада одкликала з посады дотеперішнього голову Олексия Петрова. Депутаты голосували за одкликаньом уж другій раз. Петров был при функциі од грудня/децембра 2020 р., перед тым был председом Закарпатской Областной Державной Адміністрациі. Закарпатска Областна Рада го одкликала уж 28. жолтня/октобра на своім реґулярным засіданю, но Петров товды назвал засіданя безправным. Перед своім одкликаньом звернул ся він до депутатів Закарпатской Областной Рады. Політик зас непрямо припомянул істнуваня Русинів. Повіл м.ін. такы слова: «Будте украіньскым Закарпатцьом, украіньскым Мадяром, Русином або Ромом». Олексий Петров Русинів не споминал першый раз. За тото был оскаржаный через украіньску безпеку і нацийоналистів, же діє за «політичне русиньство».

Перед нами Ден Русинів в Польщы

Малыма кроками ближыт ся 103. річниця фльориньского віче, якє дало початок Рускій Народній Республиці Лемків. 5. грудня/децембра єст і нашым нацийональным святом – Дньом Русинів в Польщы. З той нагоды Стоваришыня «Руска Бурса» в Ґорлицях і Стоваришыня Лемків просят вшыткых до спільного святкуваня. В ден 103. річниці віче перше одбуде ся поіздка до Фльоринкы, жебы в долинці перед плебанійом, де перед роками зобрали ся нашы предкы на віче, вшанувати іх памят і ідею Республикы. Дальшым пунктом Дня Русинів в Польщы 2021 буде част зорґанізувана в ґорлицкій Рускій Бурсі. Зачне ся она о 15.00 год. Др Анна Вільк выголосит выклад пн. «Довкола бадань над історийом і достоменністю Лемків». Пак буде артистична част, в якій молода композиторка з чужыны, Дария Текля Кузяк, заграт свій авторскій концерт пн. «Од традициі до сучасности». Сердечні вшыткых просиме до спільного празднуваня.

Ци Ґалля втримат посаду?

В остатній понедільок в Соймовій Комісиі Нацийональных і Етнічных Меншын голосували над одкликаньом посланця німецкой меншыны Рышарда Ґаллі з функциі єй віцеведучого. Проба одкликаня меншынового посла ся не повела, але то не конец політичного спору. Припомнийме, што під конец жолтня/октобра віцеведучый Комісиі з рамена партиі Право і Справедливіст зголосил потребу зміны президиі Комісиі, а в місце посланця німецкой меншыны мал войти посланец з урядуючой партиі. Внескодавця покликувал ся на тзв. соймову аритметику. Остаточно Ґалля остал на становиску, за його одкликаньом голосувало шіст осіб, а шіст было проти. Посол правиці Зубовскій зложыл дальшый внесок о одкликаня. Ґалля подає, што не хоче тримати ся на силу в президиі, а заєдно є засмученый, бо думал, же як член президиі і посол буде міг свобідно діяти на благо нацийональных і етнічных меншын в Польщы.

Нагородили за щыпліня

Три ґміны з ґорлицкого повіту – Бобова, Санкова і Мощениця были нагороджены в конкурсі «Збільшеный іммунітет». Плебісцит дотулят ся вшыткых ґмін в Польщы. З причыны того, же в тых ґмінах єст найбільше жытелів, што приняли вакцину, отримают они дофінансуваня – перша з них 1 млн зл, друга 500 тис., а остатня 200 тис. зл. Самоуряды можут іх выдаткувати на ціли повязаны з протидіяньом COVID-19. В першій, Бобовій вакцину приняло близко 8,5 тис. осіб, в Санковій близко 8 тис., а в Мощеници близко 6 тис.