Нецікавы рошады в Комісиі Нацийональных і Етнічных Меншын

В остатній понедільок в соймовій Комісиі Нацийональных і Етнічных Меншын голосували над одкликаньом посланця німецкой меншыны Рышарда Ґаллі з функциі єй віцеведучого. Як реляцийонувал тот єдиный в польскым соймі меншыновый посол – проба його одкликаня ся не повела. 

Тым разом не вдало ся урядуючій партиі одкликати з посады заступці ведучого Рышарда Ґаллі, але понедількове голосуваня не віщыт кінця політичного спору.

Припомнийме, што під конец жолтня/октобра віцеведучый Комісиі з рамена партиі Право і Справедливіст зголосил потребу зміны президиі Комісиі, а в місце посланця німецкой меншыны мал войти посланец з урядуючой партиі.

Внескодавця покликувал ся на тзв. соймову аритметику. Два рокы комісию вела посланкыня з Лівиці, а віцеведучы репрезентували (по єдным) Право і Справедливіст, Громадяньску Коаліцию і єдину меншыну присутну в Соймі – німецку. Подля плянів правиці в другій половині каденциі Сойму тота пропорция мала быти змінена.

Остаточно Ґалля остал на своій посаді. За його окдликаньом голосувало шіст осіб, а шіст было проти (за одкликаньом потрібна была більшіст). Посол правиці Войцєх Зубовскій зложыл єднак дальшый внесок о одкликаня. Означат тото, же Право і Справедливіст не хоче дати за выграну. Ціла процедура зас выдолжыла ся о тридцет дни, а наступне голосуваня буде мусіло быти так само проведене.

Ґалля подає, што не хоче тримати ся на силу в президиі, а заєдно є засмученый, бо думал, же як член президиі і посол буде міг свобідно діяти на благо нацийональных і етнічных меншын в Польщы. Фактом є, што до той поры, в часі вельох каденций польского парляменту – незалежено ци рядила правиця, ци лівиця – представник німецкой меншыны мал заґарантуване місце в президиі меншыновой комісиі. Ци Ґаллі поведе ся втримати посаду – дознаме ся неодолга.