Пряшівскый край зреконштруовав вступну драгу до Народного парку Полонины

Як інформовала Даша Єленьова, говоркыня Пряшівского самосправного краю, край змодернізовав драгу меджінародного значіня Стащін – Уліч коло граніць з Українов, котра єдночасно є вступом до Народного парку Полонины.

За нецілый рік ся зреконштруовало понад вісем кілометрів драг і два мосты над ріками Ціроха і Улічка. Цілковы вытраты суть веце як два міліоны евр.

Драга є вже така, як має быти

„Особно я барз радый, же тота важна жыла конечно пышыть ся новым асфалтом, бо тот реґіон собі якостны драгы стопроцентно заслужыть. Оправа трасы меджі Стащіном і Улічом была важна як про містных і їх подорожіня за роботов, так про турістічный рух в Полонинах, але і з меджінародного погляду. Бо іде о припоїня на драгу першой класы, котра єдночасно є і корідором меджінародных драг E58,“ повів у середу 10-го новембра 2021-го року почас офіціалного переданя драгы председа Пряшівского самосправного краю Мілан Маєрьскый.

Як далше пряшівскый жупан інформовав, розрахунок проєкту быв підпореный з черезгранічного операчного проґраму ENI. Край мав співфінанцованя в сумі пятьох процент з цілковых, понад двоміліоновых вытрат.

„Вступна брана до Народного парку Полонины і споїня сел з окресным містом Снина є вже по реконштрукції така, як має быти. Якостна, безпечна, комфортна, з оправленыма мостами і каналами. Тішу ся, же реалізація діла зробила ся і наперек складным условіям повязаным з ковідовыма наряджінями до нецілого рока, і днесь можеме змодернізовану драгу передати до хоснованя моторістам,“ повів Маєрьскый.

Реконштрукційов перешла майже 4-кілометрова траса Прислоп і понад 4-кілометрова траса Уліч. Обновило ся понад 55 тісяч метрів квадратных драгы. Оправлены были і два мосты, котры ведуть драгу понад корыта рік.

Будуть продовжовати другов етапов

Роботы на дразі ся реалізовали од децембра 2020-го до новембра того року. Были роблены в рамках проєкту Модернізація драгового споїня меджі Пряшівскым самосправным крайом і Закарпатьсков областьов Україны. Проєкт буде продовжовати другов етапов.

„Друга етапа проєкту є вже по конкурзі і зачатком року 2022 бы сьме ту мали продовжовати оправами на далшых майже вісем кілометрах драг, чім ся траса до Уліча оправить як єден цілок. Залежыть нам на тім, жебы і в тім пригранічнім реґіоні, на котрый ся довгодобо забывало, мали люди добру і якостну драгову іншфраштруктуру,“ додав жупан Маєрьскый.

Окрім той інвестічной акції в окресі Снина в тім році проінвестовало ся на драгы далшых 700 тісяч евр. Зреконштруовала ся драга на трасі Кална Розтока – Кленова, зробив ся новый міст в Збої ці рішыли шкоды по зливах в селі Пыхні.

Край далше планує реконштрукцію моста через потік за селом Руська Волова ці через потік Удава перед селом Гостовіці. Проєктова документація приготовлює ся про реконштрукцію драгы Гостовіці – Пчолине, на реконштрукцію моста через потік Прислоп за селом Прислоп, і реконштруцкію моста через Руськый потік перед Улічом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА