Сумар дня на 5. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 5. листопада/новембра 2021 р.

Пряшівска Архієпархія припомула собі річницю выголошыня єпископа Ґойдича за блаженного

Вчера, 4. листопада/новембра, минуло рівно двадцет років, одколи в Римі на Пляци святого Петра двох грекокатолицкых мучеників за віру – пряшівского єпарху Павла Петра Ґойдича і єромонаха Методия Домініка Тырчку, выголосили блаженныма. Річницю выголошыня за блаженных припомнула собі вчера Пряшівска Архієпархія торжественном архієрейском літургійом, котру одслужыл в Катедральным Соборі св. Йоана Крестителя архієпископ митрополита Йоан Бабяк. Як інформувал говорця Пряшівской Архієпархіі Михал Павлишынович, першы намаганя о беатифікацию єпископа Ґойдича зачали в Зъєднаных Штатах Америкы, в Чехословациі был товды тоталітарный режім, котрый боронил реліґійной свободы. Пропозицию беатифікациі трьох русиньскых єпископів – Павла Петра Ґойдича, Теодора Ромжы і Василя Гопка, Пітсбуржска Митрополия адресувала до Риму в 1983 році.

Ремонтовы працы в Бєщадскым Нацийональным Парку

Як поінформувал на своім вебсайті Бєщадскій Нацийональный Парк, в звязку з тым, же зачали ремонтовы працы направлены на выміну туристичной інфраструктуры, не буде мож корыстати з вшыткых трас. В минулый віторок закрытый до одкликаня был одтинок природничо-історичной стежкы «В долині выжнього Сану» Буковец – цмонтір Беньова. Дійти до Беньовой мож тепер лем вызначеным шляком по істнуючій біциґльовой стежці. Трасу обізду мож глядати на мапах находячых ся в терені, інтернетовым сайті парку або в інформацийно-касовым пункті Буковец. Цілковито закрыта до одкликаня в звязку з веденыма роботами єст і природнича стежка по высокым торфовиску в Тарнаві Выжній. Доступна до звиджаня остає коротша дубова лавка. Пляново стежка буде зас удоступнена на яр будучого рока.

«Пересвітліня» Алициі Пшыбышовской вкажут в Олькушы

Выставу фотоґрафій Алициі Пшыбышовской буде мож тепер обзерати в Олькушы. Вернісаж выставы пн. «Пересвітліня» одбуде ся заран, в суботу 6. листопада/новембра о 17.00 год. в Ґалериі Фотоґрафіі «Інтерференциі» в Містецкым Осередку Культуры «Підземный Олькуш». «Пересвітліня» то барз особиста візия Лемковины. Як пише сама авторка, фотоґрафуваня єст для ней досвідчыньом – то тырваючый роками процес, досвідчыня, розвиток, стрічы і бесіды з людми. Тото вшытко прібує вказати в циклю фотоґрафій «Пересвітліня». Хоче передати, як чує Низкій Бескід, передати енерґію того місця, люди, традиций, символів. Выстава гостила дотля в Новым Санчы, Белхатові, Замости і Ґливицях. В тым році інавґурувала тіж Медженародный Фестіваль Фотоґрафіі «Східня». В Олькушы буде єй мож обзерати до 6. грудня/децембра тр.

Зачала ся ревітализация рынку в Дукли

О рік рынок в Дукли буде выглядал дакус інакше. Зачали ся працы звязаны з ревітализацийом того місця. Роботы обнимати будут м.ін. перебудову тротуару вздолж рынку, будову імітациі студні з модельом міста та ремонт забытковых пивниц, якы мают быти пак удоступнены для туристичного руху. Зроблены будут новы входы до пивниц од стороны рынку, а замуруваны тоты од стороны камениц. Ревітализацийны працы мают потырвати коло рока. Кошт інвестициі то мілийон 400 тис. злотых.

Джерело фотоґрафіі: karpaccy.pl