Премєр Геґер стрітив ся з представителями реґіону Полонин

Реформа народных парків підпорена і інвестіціями з плану овбновы може фундаментално помочі при рішіню реґіоналных проблем.

У віторок 2-го новембра 2021-го року то повів председа влады Словацькой републікы Едуард Геґер по стрічі з представителями реґіону Полонин в окресі Снина. Ішло о нулту стрічу „рады народного парку“. Такы рады мають выникати по цілій Словакії, інформує аґентура ТASR.

Потребуєме алтернатіву ку лісному господарьству

„В прекраснім оточіню водного резервоару Старина єм днесь прешый раз стрітив ся з робочов ґрупов, котра буде оціньовати вызвы і План обновы Словацькой републікы в рамках реформы народных парків,“ написав на своїм профілі на сіті Facebook премєр Геґер.

„На Словакії маєме можливость выбудовати економічно самовыстачуючі реґіоны, ку чому поможе і реформа народных парків, і пересвідчів єм ся, же Народный парк Полонины є того прикладом. Утримательный розвиток реґіону потребує алтернатіву ку лісному господарьству, молода і усвідомлена ґенерація собі знать забезпечіти утримательну будучность і в атрактівнім і природі близкім турізмі, ці в еколоґічнім господарьстві, як всядыль інде у світі,“ цітовала аґентура словацького председу влады.

Слово будуть мати містны

Геґер підкреслив, же ключовов фазов про економічный розвиток реґіону є наставліня условій хоснованя фінанчных средств, і то при участи самосправ і орґанізацій, котрых ся то дотулять. Реформа в Полонинах за його словами має ґарантовати і утриманя робочіх місць, як і розвиток Лісоземледільского маєтку Уліч.

Проєкты мусять за словами словацького премєра сповняти условії розвитку аґротурізму. Ґрупу, котра буде выберати підпорены діялности і інвестіції в рамках розвитковых проєктів, будуть творити містны люди, старостове, актівісты, і так „не є правдов, же ся проєкты будуть оціньовати з Братіславы. Наопак, нашым цільом є, жебы ся штонайвеце анґажовали люди з реґіонів. Бо лем довєдна створиме ліпшу Словакію.“

План обновы подля премєра принесе еколоґічны рішіня, а єдночасно можливости, як підняти жывотну уровень в каждім реґіоні.

В повязаню з будучіма кліматічныма кроками державный секретарь Міністерства жывотного оточіня Михал Кіча вказав і на функцію лісів в народных парках што до затримованя воды. „Лем реформованый народный парк Полонины докаже достаточно забезпечіти вшыткы свої функції, соціалну, функцію затримованя воды, природну і економічну,“ повів Кіча.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА