Сумар дня на 2. листопада/новембра 2021 р.

Приносиме вам сумар медияльной ґрупы ЛЕМ.фм+ на ден 2. листопада/новембра 2021 р.

Ґміна Устя Рускє глядат охочых побудувати Музей Лемків і Руснинів

Ґміна Устя Рускє оголосила конкурс на выконавцю реконструкциі давной лемківской корчмы. Результаты конкурсу оферт будут знаны уж в половині листопада/новембра, пак выконавця буде мал рік на реализацию задачы. Плянувана реконструкция пройде в рамках польско-словацкого проєкту «Забытый світ Лемків і Руснаків» реализуваного ґмінами Устя Рускє, Кружлів і Зборів. В тот спосіб возникне Музей Лемків і Руснинів в трьох ріжных місцях по обох странах границі. Доцільово вшыткы обєкты будут творити музейну трасу, при котрій орґанізуваны будут ріжного типу культуральны подіі. По польскій страні музей найде ся в Устю Рускым в одбудовуваній лемківскій корчмі, котра буде тіж мала функцию туристичного інформацийного центра.

«Медже змерканьом а свитаньом» – што ся діє ночом в лісі?

Припоминаме, же іщы лем тыжден мож слати працы в конкурсі пн. «Медже змерканьом а свитаньом» орґанізуваным Маґурскым Нацийональным Парком. Конкурс направленый єст на учеників основных шкіл, а іх задачом єст зрыхтувати роботы, котры запрезентуют, што може ся діяти ночом в Парку. Найважнійша єст креативніст і ориґінальніст. Конкурс проходит в трьох віковых катеґориях: для кляс I-III, IV-VI і для кляс VII-VIII. В каждій катеґориі нагородженых буде 9 прац, котры будут пак презентуваны на выставі, яку одкрыют в ден розданя нагорід. Конкурсовы роботы треба слати до 8. листопада/новембра тр. на адрес Едукацийно-Музейного Осередка в Крампній.

2022 рік буде роком Ігнатия Лукасєвича

Не так давно інформували сме, што в 2022 році вкаже ся выняткова, колекцийонерска монета з представліньом Ігнатия Лукасєвича та ілюструвана байка, де головным геройом як раз буде Лукасєвич. Не єст то єднак конец пропозиций, жебы упамятнити 200. річницю народин конструктора першой на світі нафтовой лямпы. До сойму трафил внесок, жебы схвалити будучый рік роком Ігнатия Лукасєвича. Серед внескодавців нашол ся тіж бургомайстер Ґорлиц – Рафал Кукля, котрый в тот спосіб хоче упамятнити єдну з найбарже знаных персон, што звязана єст з Ґорлицями. Сойм практично єдноголосно принял концепцию і уж офіцияльно мож повісти, же 2022 рік єст роком Ігнатия Лукасєвича.

Забытковы церкви з ґміны Команча мож тепер обзерати і ночом

В жолтни/октобрі Ґміна Команча закінчыла працы звязаны з освітліньом забытковых церкви в Куляшным, Щавным, Смільнику та Радощыцях. Роботы одбыли ся в рамках проєкту «Ілюмінация обєктів культуровой спадковины трансграничной польско-словацкой роверовой трасы», веденого при спілпрацы зо Стоваришыньом Карпатскій Еврореґіон. Каждый з обєктів был освітленый специяльном інсталяцийом. Цілю проєкту было выекспонувати і піднести атракцийніст выміненых церкви. Додатково в рамках проєкту в Полаті, селі на Словациі, поставлена была макєта церкви, котра ся там находила.

Закрыты высокогірскых пути на Словациі

Од днес, як што рока 1. листопада/новембра, закрыты будут словацкы высокогірскы пути. То постійный елемент сезону на Словациі во вшыткых парках введеный з думком о охороні природы. Недоступны для туристів будут медже інчыма шлякы на Кривань ци Славковскій Верх. Додатково неможливый буде вхід на Рисы од словацкой страны.