Сумар дня на 29. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 29. жолтня/октобра 2021 р.

Буде купалиско в Санковій

Ґміна Санкова достала дальше дофінансуваня. Лем вчера інформували сме, што Ґміна достала дофінансуваня од Малопольского Воєводы на ремонт доріг, а днес приносиме віст, што завдякы Новому Порядкови ближыт ся візия басенового комплексу в Санковій. 25. жолтня/октобра в Новым Санчы прошло торжественне вручыня символичных чеків з признаным фінансуваньом высокости 9 млн зл з проґраму Новый Порядок. Чек з рук Малопольского Воєводы Лукаша Кміты одобрала війт Ґміны Санкова Малґожата Малух. В стрічы брали участ тіж посланці, сенаторы та самоурядовці з Сандеччыны. Отримане дофінансуваня вєдно з середками з тзв. гірского щыту дозволит Ґміні Санкова запроєктувати і побудувати басеновый комплекс на обшыри ґеотермального верчыня. Інвестиция буде дополніньом туристичной і рекреацийной оферты ґміны.

Засіданя про меншынове шкільництво

В середу, 27. жолтня/октобра, Державный Секретар в Міністерстві Едукациі і Наукы Дариюш Пьонтковскій провюл IV засіданя Спільной Комісиі консультацийной до справ шкільництва для польской нацийональной меншыны на Украіні і шкільництва для украіньской нацийональной меншыны в Польщы. Украіньскій делеґациі проводила Віра Рогова, Віцеміністер Освіты і Наукы Украіны. Головном темом засіданя были неґоцияциі двостранного догваріня в справі шкільництва нацийональных меншын. Омовлено тіж стан і перспективы розвитку освіты нацийональных меншын, одповідньо – польской на Украіні і украіньской в Польщы. В стрічы участ взяли тіж представникы Міністерства Заграничных Справ, Амбасады Украіны в Варшаві та польской нацийональной меншыны на Украіні і украіньской в Польщы.

В Мшані хотят выремонтувати цмонтір

Шолтыска села Мшана на східній Лемковині, Ева Качмарска-Вєнцковска, звертат ся до вшыткых осіб о поміч в ратуваню місцевого цмонтеря, на котрым находит ся 17 лемківскых крестів з ХІХ ст. Сут то головні нагробкы складаючы ся з метальового креста і цоколу з пісковця. Памятникы были очыщены і заімпреґнуваны перед 14 роками Стоваришыньом Маґурич, але вода, сонце, мороз, вітер спричынили, што цмонтір вымагат ґрунтовного ремонту. Кошт выремонтуваня єдного креста выцінено на менше більше 6 тис. зл, што дає коло 100 тис. для цілого цмонтеря. Село не єст в силі само выґаздувати такы грошы з сельского буджету, зато звертат ся з прошыньом о поміч в колекті потрібной квоты. Оператором збіркы єст Стоваришыня для Розвитку Карпатского Села «Карпатка», на конто котрого мож вплачати грошы.

ГСУ зас може дзвонити

Головный Статистичный Уряд буде вюл контрольны баданя, жебы провірити якіст даных здобытых в Нацийональным Повселюдным Списуваню Жытелів і Мешкань 2021. Анкєтеры будут контактувати ся з выбраныма особами медже 12. а 24. листопада/новембра выключні з номеру 22 828 88 88. Участ в бесіді, значыт в контрольным баданю, є так само важна як в самым Списі. Результаты баданя дадут можливіст вдосконалити будучы списы і репрезентацийны досліджыня. Ідентичніст дзвонячого анкєтера мож зверифікувати м.ін. на сайті spis.gov.pl. Подібні як вчас Повселюдного Списуваня анкєтеры не можут і не будут звідувати о высокіст заробків, номеры карт, ПІН-ы, маєток ітп. Участ в контрольным баданю єст обовязкова, реґулювана законом.