Сумар дня на 25. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 25. жолтня/октобра 2021 р.

Прошла чергова едиция ЛУТ, вынятково болота бракло

Минулый вікенд прошол на Лемковині під знаком спортовых змагань. Одбыла ся чергова едиция Лемковина Ультра Трейль, значыт змагань в гірскых бігах. Домінік Ґжондзєль з підкраківскых Дзєкановиц побил рекорд екстремальной трасы долгости 150 км з Крениці до Команчы в часі 16 годин і 37 минут. То близко о 3 минуты менше як рекорд з 2017 рока, котрый належал до Чеха Віта Отевреля. На старті змагань в бігах по Низкым Бескіді на пятьох дистансах разом стануло веце як 1000 спортовців, головні з Польщы, в тым репрезентация Лемків, але тіж з Чех, Люксембурґа, Великой Британіі, Швайцариі, Німец ци Словациі. Вручаня нагорід проходило в суботу i в неділю, бо вчера до самого полудня вшыткы спортовці, котры выстартували о 1.00 в ночы з пятниці на суботу на трасі 150 км, мали реґуляміновый час, жебы долетіти до меты. Сумаричні спортовці пробігли 75 814 км, 24% участників змагань то были жены, 76% мужчыны. О комфорт і безпеку дбало веце як 210 волонтерок і волонтерів та 4 ратівників і парудесят осіб додатковой обслугы.

Нова русиньска публикация

В минулый четвер, 21. жолтня/октобра, в Центрі Культур Нацийональных Меншын Закарпатя в Ужгороді проходила презентация книжкы пн. «Унгвар – Ужгород. Муй рудный варош». Автором публикациі є знаный русиньскій історик і краєзнавця Людвіг Філіп, котрый є і честным председом Ужгородского Культурно-Освітнього Общества імени Александра Духновича. Скорше, бо в червци/юнію того рока вышла украіньска версия книжкы. На презентациі русиньской версиі автор розповіл о тяжкій пути, котру перешла сеса публикация, нич повело ся єй печатати. Підкрислил, што не было бы то можливе без помочы Бориса Жулканича з Ужгородского Нацийонального Університету. Модератором презентациі был Євген Жупан, голова Народной Рады Русинів Закарпатя.

«Дукляньскій Взірник» і «Вкорінены в спадковину»

В пятницю, 29. жолтня/октобра, в Етноцентрі Коросняньской Землі пройде стріча, што буде підсумуваньом проєктів «Дукляньскій Взірник» і «Вкорінены в спадковину» реализуваных Фундацийом для Культуры «Валізка». Цілю черговых діянь Фундациі є робити на хосен локального дідицтва. Два послідні проєкты были посвячены охороні і популяризациі деревяной архітектуры. На стрічы буде представлена публикация «Дукляньскій Взірник», запрезентуваный фільм о домі, котрого авторами сут діти (зробили го в рамках варштатів покляткового фільму). Буде вказаный і альбом «Без кінця», зрыхтуваный фотоґрафком Моніком Якєлом, про нескінчену історию деревяных хыж. На стрічы будут тіж запрезентуваны кльоцкы для діти «Карпатскє село», зроблены як прототип і пропозиция нарядя до едукациі о дідицтві. Каждый, хто принесе зо собом кошельку ци полотняну торбу, буде міг си одбити методом лінорыту єден з дукляньскых взорів.

Будут хоснувати символы звязаны з копальняном професийом

«Мати мід» то назва проєкту, якій як раз проходит в Польковицях. Орґанізаторы просят на безплатны керамічны варштаты, варштаты біжутериі, дізайну ци ґрафіті. То подія, котра посвячена є копальняній спадковині того мідьового реґіону. Участникы під оком професийных інструкторів будут надавати сучасный контекст, робити творчу інтерпретацию та реінтерпретацию символам звязаным з копальняном професийом. Першым етапом діянь было зробити каталоґ найважнійшых традиций і атрибутів копальняной культуры. Публикация «Символы мідьового копальництва» доступна єст на сайті kulturolubni.pl. Роботы зроблены вчас варштатів будут презентуваны на окремій выставі, яка буде підсумуваньом проєтку «Мати мід».