Сумар дня на 19. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 19. жолтня/октобра 2021 р.

Лемківска Творча Осін за нами

В минулый вікенд – 16. і 17. жолтня/октобра, прошла ХХІХ едиция Лемківской Творчой Осени. Подія одбывала ся в двох місцях – в Креници, і традицийно, в Рускій Бурсі в Ґорлицях. Посвячена была митрополиті Йосифови Сембратовичови, в 200. річницю його народжыня. Грекокатолицкій галицкій митрополита і львівскій архієпископ Йосиф Сембратович был одданым народови і Церкви Русином, котрый остатні рокы свойого жытя прожывал на выгнаню в Римі. Доповіди о ним мали др габ. Олена Дуць-Файфер і Петро Мурянка. В дальшій части Осени запрезентували ся творці русиньского писаного слова, як і тоты, котры пропаґуют лемківску літературну творчіст в чужых языках. На конец з концертом выступила Сусанна Яра в акомпаніяменті контрабасисты і перкусисткы.

На бічскым рынку на туристів жде нова атракция

Іщы перед пандемійом інформували сме о новых атракциях, котры мали прикрасити Біч. Іде о фіґуру ката, якій звязаный єст з історийом Біча. Атракция мала ся появити на рынку уж рік тому, єднак зо взгляду на ситуацию релизация проєкту ся опізнила. Фіґуру зроблено з металю, так жебы як найдокладнійше презентувала дрібниці облечыня ката. Не єст то конец новых атракций на бічскым рынку. При каті поставлены будут по штырі фіґуры вязненых мужчын і жен, додатково експозиция буде выпосажена в реплику нарядя хоснуваного при тортурах. Ціла інсталяция буде готова перед кінцьом рока.

 «Карпатскы облича»

Культурный Центр в Перемышли просит до участи в фотоґрафічным конкурсі пн. «Карпатскы облича». Цілю конкурсу єст промоция не лем самых Карпат, але тіж творців фотоґрафій. Задачом єст як найліпше вказати на знимці красу реґіону, забыткы, котры ся гев находят, архітектуру, ляндшафтны паркы, але тіж люди ци подіі. Конкурс направленый єст на полнолітніх участників. Каждый може переслати максимальні три працы. Для нагородженых і выріжненых артистів сут фінансовы нагороды. Знимкы треба переслати до 2. листопада/новембра. Реґулямін конкурсу находит ся на сайті перемышльского Культурного Центра.

#BieszczadyPamietaja 

Тырват соспільна акция «Бєщады Памятают». Єй цілю єст вратувати перед забытьом села, што ся находят ся на обшыри Бєщадів, в котрых мешкали і Лемкы, а якы по акциі «Вісла» лишыли ся порожні. Бесіда гев м.ін. о Беньовій, Тисковій ци Лопянці. Окрем диків садів, по давных жытелях лишыли ся цмонтері, церквиска ци придорожны кресты. Орґанізаторы акциі заохочают туристів і жытелів Бєщадів опікувати ся выміненыма місцями, головні порядкуючы іх. Пропонуют тіж, жебы поділити ся своіма діянями, публикуючы в социяльных медиях знимкы з гаштаґом #BieszczadyPamietaja.

ПУНА нагородженый в Чемпіонаті Світа в Народных Танцях

В минулый вікенд ансамбль ПУНА з Пряшова, котрый не так давно мож было видіти в Ґорлицях в рамках святкуваня 30. річниці реактивациі Стоваришыня Руска Бурса, взял участ в Чемпіонаті Світа в Народных Танцях FIDAF в Бразилиі. Ґрупа достала ся до фіналовой 12, де была нагороджена «Honorable Mention Award». Припоминаме, же ПУНА то єдиный в світі професийный ансамбль, якій занимат ся презентуваньом русиньского фольклору. Сердечні ґратулюєме!