Сумар дня на 15. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 15. жолтня/октобра 2021 р.

Світова Рада Русинів засідала в Хорвациі

25. вересня/септембра тр. одбыло ся 2. поконґресове засіданя Світовой Рады Русинів, котре проходило в Старых Янковцях в Хорвациі. Члены СРР створили фінальну версию резолюциі, котра была принята на XVI Світовым Конґресі Русинів в Креници. Медже головныма єй пунктами зас нашло ся жаданя направлене на власти Украіны, жебы вызнати Русинів як окрему нацийональну меншыну. Конґрес зажадал, жебы в слідуючым переписі населіня і Русины на Украіні могли ся приголосити до свойой нацийональной меншыны і материньского языка, а результаты были публикуваны окремо, як в дальшых европейскых державах, а не як результаты украіньского субетносу. Остатній конґрес вызначыл координатора, якій має прилучыти дальшы русиньскы орґанізациі Підкарпатя до спільной роботы з конґресом. Рада окрислила конкретны задачы, якыма ся має він заняти. Найблизше засіданя СРР має проходити в лютым/фебруарі 2022 р. в Румуніі, а наступне мало бы ся одбыти як раз на Підкарпатскій Руси. На засіданю члены Рады офіцияльно поздоровили і радийо ЛЕМ.фм з нагоды святкуваня 10-літя діяльности.

Авторска стріча з проф. Штефаном Дудром

Стоваришыня «Ґлоґівска Кресова Едукация», Містна Публична Бібліотека в Ґлоґові, Містна Публична Бібліотека – Центр Знаня Болеславец та Містно-Ґмінна Публична Бібліотека в Польковицях просят на авторску стрічу з проф. Штефаном Дудром пн. «Одкаль походят Лемкы жытелі Нижнього Шлеска по 1945 р.?». Стрічу буде вюл редактор нашого радия ЛЕМ.фм Даміян Трохановскій. Одбуде ся она о тыжден, в пятницю – 22. жолтня/октобра, о 20.00 год і буде трансмітувана на фейсбуковым сайті Стоваришыня «Ґлоґівска Кресова Едукация». Проф. Штефан Дудра єст автором такых публикаций як «Лемкы Бойкы Русины / істория, теперішніст, материяльна і духова культура», «Церков в діаспорі / з діів православной вроцлавско-щеціньской єпархіі» і «Польска Автокефальна Православна Церков в обшыри конфесийной та нацийональной політикы Польской Народной Республикы і ІІІ Польской Республикы». Єст репрезентантом лемківской меншыны в Спільній Комісиі Уряду та Нацийональных і Етнічных Меншын.

Ювілей здружыня Rusini.cz і фольклорной ґрупы Тріо Кантар

В суботу, 6. листопана/новембра, своє десятлітя одсвяткує здружыня Rusini.cz, русиньска ініциятива в Чешскій Республиці. Ювілей пят років од основаня буде святкувала і русиньска фольклорна ґрупа Тріо Кантар. З той нагоды орґанізация вєдно з ансамбльом просят на концерт пн. «Десят рочків долгій час…», на котрым ся запрезентуют, окрем ювілята – ґрупы Тріо Кантар, фольклорны ансамблі Шарванці з Прагы та Піречко зо Словациі. По концерті буде мож взати участ в музичній забаві. Подія зачне ся о 17.00 год. в Домі Нацийональных Меншын в Празі.

Самітный волк атакувал домашню звірину в ґмінах Санкова і Устя Рускє

Ґміны Санкова і Устя Рускє зас отримуют скаргы од жытелів, же волкы підходят під забудуваня. В обох ґмінах атакувана была домашня звірина. Правдоподібно атакувал самітный волк. Війт ґміны Санкова, Малґожата Малух рішыла, же ґміна выступит до дирекциі охороны середовиска о згоду на селекцийне одстріліня. Ґміна покля што апелює, жебы не выходити самітно до ліса, не выпущати псів на ніч і пильнувати домашньой звірины. Ґміна Устя Рускє зареаґувала подібні як Санкова. Як повіл Збіґнєв Людвін, війт ґміны, так само выступили о згоду на одстріліня. Дальше рішыня в тій справі буде мала тепер Реґіональна Дирекция Охороны Середовиска.