Служба з нами, хто проти нас?

В септембрі воды україньского націоналізму на Підкарпатю розрушала навщіва Павла Роберта Маґочія, котрый собі дозволив на їх землі зробити дві презентації свойой книжкы о формованю народного самоусвідомліня на Підкарпатьскій Руси.

По тім, што не доказали заборонити презентаціям в бібліотеках, як тому было пару років тому з іншов книжков Маґочія, треба было найти виноватого. Хто то вже лем є, хто колаборує з Русинами? Одповідь на себе не зохабила довго чекати. Виноватого нашли. Быв ним Олексій Петров.

Петров, котрый є од 2020-го року головов Закарпатьской областной рады, перешов вже веце державныма посасами. Ту треба підкреслити, же є офіціром спецслужб і діяв на ведучіх функціях Службы безпекы Україны.

По тім, што презентації успішно одбыли ся, і поліція не хотіла впустити на презентацію в Ужгороді ултра націоналістів, быв обвиненый з підпоры політічного русинства якраз Олексій Петров.

Не было тов головнов причінов зробити з нього „ворога“ аж то, же дав офіціалне выголошіня, же вопрос русинства є европскым вопросом і Русины мають право о своїй ідентіті вырішовати самы?

На засіданю Закарпатьской областной рады, котре проходило 23-го септембра, то на Петрова вытягли. Підтримує „політічне русинство“! Окрім того быв обвиненый  з того, же векшыну в областній раді формує за участи „проросійской партії“.

Лемже, кедь ся смотирме на часову ос, дашто ту не пасує. Ужгородьска презентація проходила 2-го септембра. Презентація у Виноградові о пару днів пізніше. Олексій Петров, кедьже обвиніня зачали на нього метати такой при презентації в Ужгороді, такой 3-го септембра дав на своїм офіціалнім профілі на сіті Facebook своє выголошіня. Было курте і ясне.

У своїм выголошіню Петров написав, же бібліотекы самы рішають о тім, што в них буде проходити і не думать, же є потрібне дозволяти або забороняти події, покля проходять „цівілізованым способом“. Односно русиньского вопросу Олексій Петров написав, же є абсолутно европскым, гражданы мають право на самоідентіфікацію, і ани держава, ани орґаны самосрпавы не мають право в тім перешкаджати, што говорить і україньска леґіслатіва. Покля ся появить сепаратізм, мають то рішыти односны орґаны.

Ідеме знова по часовій оси. Є 23-го септембра і на засіданю Закарпатьской областной рады є Петров обвиненый з підтримкы „політічного русинства“. Лана Мисник го на проталі 0312.ua докінця меджі часом назве „латентным сепаратістом“.

Вопрос стоїть теперь так. Выслужыв бы собі означіня латентный сепаратіста, припадно обвиніня з підтримкы „політічного русинства“ Олексій Петров в областній раді, кебы лем одбыли ся презентації книжкы і він то нияк не коментовав? Не было тов головнов причінов зробити з нього „ворога“ аж то, же дав офіціалне выголошіня, же вопрос русинства є европскым вопросом і Русины мають право о своїй ідентіті вырішовати самы?

Є смішне обвиньовати офіціра СБУ з підтримкы „політічного русинства“ і сепаратізма. Обвиньованя зо сепаратізма вже досягує небесных высот, і націоналісты не мають граніць. Кедь є про них европске рішіня народностных вопросів сепаратізм, пак бы не мали стояти на пути до Европы, і обернути ся на якусь іншу світову сторону.

На другім боці, кедь уж бы то так подля них мало быти, як говорять, пак ся звідам, кедь служба з нами, хто проти нас?

Статя была написана як коментарь „Вступне до контроли“ лемківского радія lem.fm.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА