Сумар дня на 12. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 12. жолтня/октобра 2021 р.

«Ровером через Погранича» – роверовый райд по Маґурскым Нацийональным Парку

Маґурскій Нацийональный Парк просит до участи в конкурсі «Ровером через Погранича». Змаганя проходят од 9. жолтня/октобра до 15. листопада/новембра. В рамках райду треба переіхати індивідуально або в ґрупі єдну з вызначеных орґанізатором трас в обшыри парку або в його отулині. 100 першых участників, якы переіхают мін. 10 км вызначеной трасы і удокументуют то слідом GPS та додатково перешлют 5 знимок з характеристичных пунктів на трасі, отримат Памятковый Пакєт. Список трас і пунктів, де треба зробити знимку, находит ся на сайті Маґурского Нацийонального Парку. Роверовый Райд реализуваный єст в рамках проєкту «Ровером через Погранича – природа, культура і істория на двох колесах». Цілю ініцятивы єст промоция роверовой стежкы «Незнайова» та навязаня спілпрацы з ґмінами, на обшыри котрых істнує Парк, особливо з Ґміном Санкова і Дукля, але тіж селом по словацкій страні – Нижна Полянка. З той тіж причыны єдна з трас і пару характеристичных пунктів находит ся на Словациі.

В Верхомли выремонтуют понад кілометровый одтинок дорогы

В цілій Малопольщы по червцьовых і липцьовых дощах лишыло ся вельо страт – были зорваны мосты, пошкоджены дорогы, знищена інфраструктура. В Верхомли по літніх зливах реновациі потрібує як раз дорога. З той причыны новосандецкій повіт оголосил конкурс оферт на направу понад кілометрового одтинка, і як заповідают – то аж і початок дороговых змін. Інвестиция тыкат більше як кілометрового одтинка дорогы од мосту в долину села, в страну воєвідской дорогы но. 971. В рамках ремонтовых прац треба сфрезувати стару верству і наложыти нову варству асфальту та одбудувати і зміцити побоча. Закля што не знатя, кілько вынесе інвестиция, вшытко залежыт од результатів конкурсу оферт. Кєд в тым році даст ся найти выконавцю, то ціліст прац буде выконана до кінця того рока.

Жытелі полудньовой Польщы на знимках з XIX і XX віку

Eтноґрафічный Музей в Кракові закінчыл реализацию проєкту діґітализациі забытковой колекциі шкляных неґативів і фотоґрафій з другой половины XIX і першой половины XX віку. З той нагоды Музей одкрыл інтернетовый сервіс, де мож видіти зобраны знимкы. Збірка рахує понад два тис. елементів, што вказуют спільноту і культурову спадковину полудньовой Польщы з того періоду, в тым Лемковины. В збірці находят ся знимкы сакральных обєктів, святочного облечыня ци обрядів, але тіж презентуют они просты ситуациі зо штоденного жытя. Працівникы музею заохочают корыстати зо знимок. Як підкрисляют, то неоціненне джерело інформаций не лем для дослідників, але тіж вшыткых, котры інтересуют ся ідентичністю своіх місцевости.

Закінчыня дороговых прац в Перегримці опізнит ся о два тыжні

Головный выконавця модернізациі воєвідской дорогы 993 на одтинку Новый Змигород – Перегримка, фірма STRABAG поінформувала, же з причыны змінных атмосферичных обставин і збільшыня обшыри прац необхідне єст выдолжыти час, коли закрытый буде ремонтуваный одтинок дорогы – од 7. до 23. жолтня/октобра.

«Церкви в полудньово-східній Польщы» авторска стріча в Ряшові

Выдавництво Лібра просит на промоцию альбому «Церкви в полудньово-східній Польщы». В четвер, 14. жолтня/октобра, о год. 17.30 одбуде ся стріча з автором фотоґрафій Камільом Палюшком та автором тексту Ярославом Ґемзом. Подія пройде в Книгарни Лібра в Ряшові. Як інформує выдавництво на своім фейсбуковым профіли, рыхтуваны сут уж наступны промоцийны стрічы в інчых містах Польщы.