Сумар дня на 7. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 7. жолтня/октобра 2021 р.

В Свиднику однзачыли Ден Героів Карпато-Дукляньской Операциі

6. жолтня/октобра є на Словациі дньом, коли припоминат ся Ден Героів Карпато-Дукляньской Операциі, котра была єдном з найбарже кырвавых операций ІІ світовой войны. Як каждый рік, так і вчера в Дукли і в Свиднику, де є памятник армадного ґенерала Людвіка Свободы і памятник совітскых героів, одбыли ся памятковы подіі, котры зачали о девятій рано. В упамятнінях брали участ представникы державы, краю і самосправы, медже інчыма председа Нацийональной Рады Словацкой Республикы Борис Коллар, міністер обороны Ярослав Надь ци председа Пряшівского Самосправного Краю Мілян Маєрскій. На подіі были і Воздушны Силы Озброєных Сил Словацкой Республикы. Міністер Обороны передал Памятный Медаль Міністра другой ступени Франтішкови Орльовскому, котрый ся придал ґу партизанам як 16-річный хлопец.

Одкрытя видоковой вежы в Дукли

З річницьом упамятнінь Карпато-дукляньской операциі, при участи Міністра Обороны Словацкой Республикы Ярослава Надя одбыло ся святочне одкрытя видоковой вежы в Дукли. В минулых місяцях вежа перешла комплетну реконстрикцию. Фінансы на ню дало Міністерство Обороны цілю заінтересувати люди, а головно молодых люди воєнном історийом Словациі. Вчас святочного одкрытя міністер Надь в просторах вежы оцінил Памятным Медальом Міністра Обороны in memoriam 32 участників войны, котры вызначно помогли в борбі проти фашызмови. Пак было тіж символичне переданя історичных експонатів, м.ін. танків. Зреконструувана танкова техніка тепер зас реалистично припоминат в Долині Смерти битвы, якы на тій обшыри проходили в 1944 р.

Вернул потяг Ясло-Біч-Краків

Mалопольскы Желізниці вернули вікендовый потяг реляциі Ясло-Біч-Краків. Потяг курсує одтепер в пятниці з Кракова до Ясла і в неділі з Ясла до Кракова. Получыня было одкрыте наново головно зато, што вельо осіб з першым дньом жолтня/октобра зачало новый академіцкій рік. Як інформуют Желізниці, привернене вікендове получыня то добра опция і про туристів зо столиці Малопольщы, якы будут мочы на вікенд піти на полудне реґіону. Потяг іде і через дальшы лемківскы землі і затримує ся м.ін. на стациях Ґорлиці Заґужаны ци Новый Санч. А в звязку з модернізацийом желізницьовой леніі но. 108 на одтинку медже Бічом а Яслом єст ведена заступча автобусова комунікация.

В Музею Русиньской Культуры в Пряшові мают салю ім. Михала Дубая

В Словацкым Нацийональным Музею – Музею Русиньской Культуры в Пряшові одбыла ся в пятницю, 1. жолтня/октобра, святочна подія. Нововыремонтуваны просторы достали назву Выставной Салі Михала Дубая і на стіні прибыла памятна таблиця, котра припоминат тоту особу русиньской культуры на Словациі. В подіі брали участ і члены чысленной родины Дубайовых. Таблицю подарувала дівка Михала Дубая. Єй автором є дальшый русиньскій вызначный творця Штефан Гапак. Першом выставом, котру запрезентувано в новых просторах, была як раз выстава під назвом «Дубайовы – Анна і єй діти». О родині Дубайовых бесідувала директорка музею Люба Кральова, пак голос мала і кураторка музею Данєля Капральова, яка і одкрыла памятну таблицю.