Выглядкова вежа на Дуклі знова приступна навщівникам

З нагоды 77-ой річніці Карпато-дукляньской операції в середу 6-го октобра 2021-го року за участи міністра обороны Словацькой републікы Ярослава Надя одбыло ся святочне одкрытя Выглядковой вежі на Дуклі.

Як інформовала аґентура TASR, в попередніх місяцях вежа перешла комплетнов реконштрукційов. Фінанції на ню дало Міністерство обороны з цільом підпорити інтерес людей, а головно молодых людей о воєньску історію Словакії.

Доступность і комфорт про навщівників

Цільом реконштрукції выглядковой вежі было подля директора Воєньского історічного інштітуту Мірослава Чапловіча підняти їй атрактівность, а так само доступность і комфорт про навщівників.

„В резорті обороны нам на історії досправды залежыть, што потверджуєме підпоров справованых інштітуцій в старостливости о окремы експонаты і обєкты, якым є і облюблена выглядкова вежа на Дуклі. Окрім того посередництвом дотачных механізмів підтримуєме і мімовладны орґанізації в реалізації смыслуповных проєктів повязаных з історійов Словацькой републікы,“ повів міністер Надь.

Почас святочного одкрытя, котре одбыло ся в памятный день – День героїв Карпато-дукляньской опрації, Надь в просторах вежі оцінив Памятнов медайлов міністра обороны in memoriam 32 участників народного одбоя за ослободжіня, котры вызначно помогли в боротьві проти фашізма.

Передали історічны експонаты

Меджі селами Капішова, Кружльова і Нижня Писана, в такзваній Долині смерти, пак одбыло ся сімболічне переданя історічных експонатів – танків T-34/85, пожыченых Воєньскым історічным інштітутом, котры зреконштруовало Здружіня мікрореґіону Долина смерти. Проєкт підпорив резорт обороны із свойой дотачной схемы.

Зреконштруована танкова техніка теперь знова реалістічно припоминать навщівникам Долины смерти танковы битвы, котры в тім просторі проходили од 25-го до 27-го октобра 1944-го року.

Жрідло фотоґрафії: Ярослав Надь.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА