Сумар дня на 5. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 5. жолтня/октобра 2021 р.

Інформуваня в языках нацийональных меншын в світлі реализациі Медияльной Стратеґіі Сербской Республикы

НВУ «Рускє слово» та Орґанізация Безпекы і Спілпрацы в Европі просят на середу, 6. жолтня/октобра, на конференцию «Інформуваня в языках нацийональных меншын в світлі реализациі Медияльной Стратеґіі Сербской Республикы». Стріча пройде в інтернетовій формі і орґанізувана єст при підпорі Незалежного Здружыня Новинарів Сербіі і Незалежного Дружства Новинарів Войводины. В конференциі возмут участ і Олена Папуґа – державна секретарка в Міністерстві Прав Чловека і Меншын та Социяльного Діалоґу, Таня Арва-Планчак з Нацийонального Совіту Русинів та Борис Варґа, директор НВУ «Рускє слово». Головном темом стрічы буде значыня самореґуляциі медий, значыт Внутрішнього Етичного Кодексу для Медий, якій під конец 2019 р. підписало Рускє Слово і Нацийональный Совіт Русинів.

Клюб «Орлы» глядат охочых до помочы при прятаню цмотерів з І світовой войны

Війт ґміны Санкова, Шолтыс села Ропиця Руска та презес кружка ПТКТ Гірскій Клюб «Орлы» при Столичній Коменді в Варшаві просят на VI едицию прятаня цмотерів з І світовой войны. Акция буде проходила од 7. до 10. жолтня/октобра на обшыри ґмін Ґорлиці, Санкова, Крампна, Лужна і Устя Рускє. Охочы прошены сут о скоршый контакт. В рамках акциі в Народным Домі в Ропици Рускій зорґанізувана буде выстава Вальдемара Добровольского «Ґалицийскы цмонтері – пізріня по 100 роках. Воєнны цмонтері в архівальным і теперішнім порівнаню – округ ІV – Лужна». Деталі найдете на офіцийным фейсбуковым сайті Гірского Клюбу «Орлы».

В столици пройде Ден Словацкой Культуры

Уряд Району Урсинів при спілпрацы зо Словацкым Інститутом в Варшаві просят на Ден Словацкой Культуры на Урсинові. В рамках фестівалю мож буде познати словацкых творців і артистів та видіти і слухати народны інструменты. Орґанізаторы подіі просят тіж до ґастрономічной стрефы, де мож буде попрібувати реґіональны стравы. Головном атракцийом буде выступ ансамблю Грдза. Подія зачне ся о 11.00 год. на паркінґу при Уряді Району Урсинів.

Роверовым шляком церкви

Ґміна Команча зреализувала промоцийный фільм «Роверовым шляком церкви». Презентуваны в образі церкви находят ся в такых місцевостях як Куляшне, Щавне, Смільник ци Радошыці. О забытковых обєктах оповідат в фільмі Роберт Банькош зо Стоваришыня Туристичных Провідників КАРПАТЫ. Продукцию можете обзерати на сайті Ґміны Команча.

«Каменяре Кычеры» займут ся цмонтерями з Лемковины

В остатнім часі інформували сме о ремонті цмонтеря в Лабовій, якій орґанізуваный єст Стоваришыньом ЛАПіТ «Кычера». Як подают орґанізаторы акциі, роботы помалы ся кінчат. Ближучый ся фінал ремонту не означат єднак закінчыня ремонтовой діяльости, явила ся бо ідея, жебы ратувати стары лемківскы цмонтері. Заінтересуваня проєктом, в тым особливо чысло волонтерів, котры приіхали з ріжных стран світа, та досвідчыня, котре здобыли участникы, рішыли о покликаню при Стоваришыню ЛАПіТ «Кычера» ґрупы «Каменяре Кычеры». По завершыню прац в Лабовій «Каменяре Кычеры» займут ся реновацийом наступных лемківскых цмонтерів.