Презідентка: Реґіоналны розділы мають і народностный розмір

Презідентка Словацькой републікы Зузана Чапутова у віторок 28-го септембра 2021-го року выступила в Народній раді Словацькой републікы зо свойов Справов о стані републікы.

Ішло о другу шторічну оцінку, котру прочітала в пленумі словацького парламенту од їй наступліня на посаду презідента. З першов справов выступла в юні 2020-го року. Презідентка дотулила ся найважнішых тем, котры моментално Словакія рішыть. Знова припомянула і реґіоналны розділы.

Реґіоналны розділи і в контексті народностей

Презідентка оцінила крокы влады, котры ведуть ку санації економічных допадів пандемії, єдночасно повіла, же треба признати і недостаткы. Звернула увагу і нато, же днесь уж треба думати на будучность.

„Днесь ся вже вырішує о тім, ці докажеме створити условії про продовжованя економічного розвитку. Днесь ся вырішує о тім, ці буде жывотна уровень приближовати ся штандарду в западных державах, або будеме стаґновати. Жадна влада не мала к діспозіції тілько средств як тота днешня. Фінанчны жрідла в подобі еврофондів і плану обновы суть достаточны на модернізацію нашой сполочности, на піднята выконности і утримательности нашого господарьства, і на забезпечіня условій про роснутя жывотной уровни,“ повіла презідентка в Народній раді.

„Жебы сьме тот ціль досягли, мусиме з повнов важностьов рішыти тему біды і реґіоналных розділів, котры на южній, середній і выходній Словакії мають і народностный розмір,“ продовжовала голова державы.

„Сьме свідками величезных реґіоналных розділів і взнику соціалных нерівностей. Не можеме не смотрити жывоты розділеных родин, в котрых суть матери або отцьове примушены подорожыти за роботов до заграніча, опущаючі свої діти, бо дома собі не знають найти роботу, котра бы їх достойно ужывила.“

Чапутова в прояві спомянула в контексті реґіоналных розділів южну, середню і выходну Словакію, значіть реґіоны, де має велике чісло жытелів мадярьска, ромска і русиньска народностна меншына.

Припомянула то не першый раз

Презідентка в повязаню з реґіоналныма розділами спомянула і контекст народностных меншын не першый раз. Односно той темы высловила ся і в писмі, котре загнала на XV. Світовый конґрес Русинів, якый проходив у Любовняньскых купелях у 2019-ім році.

„Не треба забывати ани на матеріалну і соціалну сторінку достойности чоловіка. В дослідку реґіоналных нерівностей суть молоды Русины і Русинкы з выходословацькых окресів примушены переселяти ся за роботов до іншых реґіонів Словакії або і до заграніча. То проблема економічна, котра має неґатівны ефекты на якость жывота в тых областях. Но в припаді Русинів, і народностна проблема. Примушеный одход молодых ослаблює звязкы, через котры комуніта утримує свою културну і языкову дідовизну,“ писала втогды презідентка делеґатам конґресу.

Жрідло фотоґрафії: RTVS.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА