«Слово» – 14-та неділя по Сошествії Святого Духа – неділя, 9.00 год.

Ісус приближує Царьство Боже в образі царьской свадьбы, на котру были закликаны многы. Но як уж было готове вшытко, царь послав закликати запрошеных, жебы уж пришли і радовали ся з царьом.

Но они ся выгваряли, дакотры іщі і зневажыли царьскых послів. Тогды царь сю розгнівав, послав войско і їх выгубив. Потім послав своїх рабів, жебы ішли всядыль і привели каждого, кого найдуть. І быв меджі нима єден чоловік, котрый не мав свадьбляне облечіня. Царь му наказав звязати рукы і ногы і шмарити до вонкашньой темноты.

Днешнє слово указує нам на історію выбраного народа і покликаня поганьского світа до Царьства Божого, і наше покликаня до Церькви і до спасіня. Бог посылать свойого Сына, котрый проповідать меджі выбраним народом. Апостолы суть посланы, жебы проповідали як Жыдам, так і поганам. Каждый є покликаный, нихто не є вылученый.

Но єден чоловік без належного облечіня: хто він є? Чом така строгость царя? Бо він быв закликаный а каждому закликаному Царь послав свадьбляны шаты, но він погордив царьом і не облік ся до них.

Святым хрещіньом мы вшыткы приїмаме таке належне облечіня, котре нам посылать наш Небесный Царь. Посквернити, забрудити або стратити тото облечіня значіть по крещіню вернути ся до гріха, до роскоші, до страстей.

Но і ту Бог давать средство – тайну покаяня. Тогды ся нам тото облечіня знова вертать назад. Так видиме, же тото чоловік не мав выгварькы бо быв тихо. Прото тото слово є адресоване і нам – мерькуйме, жебы тото хрестне облечіня сьме не посквернили або не стратили. А кедь ся так стане, такой приходьме до тайны покаяня, покы маме час, жебы не вошли без нього а не были вышмарены до вонкашньой тмы. Не на даякай час, але на цілу вічность. Слава Ісусу Хрісту!

В неділю, 26. септембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. септембра о 12.00 год. і 27. септембра о 2.00 год. за русиньскым часом.