Капітула Нагороды ім. Райнфуса жде на зголошуваня кандидатів

До 29. жолтня/октобра 2021 р. мож зголошувати кандидатів до 10. едициі Нагороды Малопольского Воєвідства ім. Романа Райнфуса. Оцініня є признаване за выдатны осягніня в обшыри плеканя локальной культуровой достоменности в Малопольщы.

Дотоля нагорода была признана і пару особам діючым на благо лемківской культуры. Ювілейна едиция то шанса, жебы зголосити дальшых кандидатів – одданых нашій справі.

Здібным і одданым

О нагороду можут ся старати кандидаты, якы активно діют на благо даной культуры в Малопольщы. Можут то быти особы, якы професийно занимали/занимают ся даяком обшырю, або такы, што своі стараня проявляли на соспільній ниві. Іде про такых кандидатів, якы прим. діяли для охороны материяльной і духовной спадковины, в тым народного кумшту і артистичного ремесла. Капітула кличе і такы особы, якы трудили ся охороном традициі ци фольклору.

На лавреатів жде пуля 20 тис. зл, яка є уфундувана з воєвідского буджету. Передвиджено три головны нагороды. В рамках оцініня можут быти признаны і два выріжніня, якы не мают фінансовой підпоры.

Нагорода ім. Райнфуса

Патроном нагороды є Роман Райнфус – польскій етноґраф і дослідник народного кумшту, якій звязаный был свойом науковом діяльністю з карпатскыма ґрупами, в тым з Русинами. Оцініня єст офіцияльном нагородом Малопольского Воєвідства, схваленом його соймиком. Выріжніня признає ся каждорічно од 2012 р.

Дотля нагороду за плеканя лемківской культуры отримали м.ін. уж двократно Петро Трохановскій (2013 р. і 2021 р.), Антоний Крог (2014 р.), Павел Стефановскій (2017 р.) та посмертно Федор Ґоч (2018 р.).

Кандидатів можут зголошувати вшелеякы інститициі культуры, в тым лемківскы орґанізациі. Треба подати зголошыня до капітулы найпізнійше до 29. жолтня/октобра 2021 р.

Детальны інформациі вєдно з формулярьом зголошыня доступны сут за тым мотузком.