Сумар дня на 21. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 21. вересня/септембра 2021 р.

Санкова, Стропків, Бобова, Нижня Полянка- штырі ґміны, єдна думка, спілный проєкт розвитку трансграничной обшыри 

Ґміна Бобова разом з Ґміном Санкова схоснуют дофінансуваня на реализацию партнерского проєкту пн. «Санкова, Стропків, Бобова, Нижня Полянка – зміцніня трансграничной спілпрацы в обшыри культурово-природничой спадковины». Проєкт має на ціли розвиток погранича та зміцніня спілпрацы штырьох ґмін, двох з Польщы і двох зо Словациі. В рамках проєкту кажда з ґмін зреализує выбраны задачы, в Бобовій побудуют амфітеатр і вызначат новы роверовы стежкы. Ґміна Санкова дофінансуваня передаст на будову природничо-едукацийного парку в Сярах і будову роверовой стежкы, котра получыт церкви вписаны на світову листу UNESCO в Санковій і Рыхвалді. Додатково вызначено спільны задачы для вшыткых ґмін проєкту. Сут то м.ін. орґанізация Фестівалю Культуры Погранича, выданя польско-словацкого часопису ци выданя книжкы на тему істориі обшыри погранича. Проєкт має быти зреализуваный до 30. квітня/апріля 2023 рока.

В 2022 році мож буде купити колекцийонерску монету з представліньом Ігнатия Лукасєвича

Уряд Міста Ґорлиці подал, же в марци будучого рока Нацийональный Польскій Банк выпустит выняткову, колекцийонерску монету з представліньом Ігнатия Лукасєвича з нагоды 200. річниці його народин. З внеском выбити єй вышол бургомайстер Ґорлиц Рафал Кукля. Як підкрислил, тішыт ся з позитивного розсмотріня внеску і можливости упамятніня так важной для Ґорлиц персоны. Колекцийонерскє срібрне десять злотых з Лукасєвичом буде тіж добром нагодом до промоциі Міста Світла. Надіє ся тіж, же будучый рік буде роком Лукасєвича, в тій справі был уж зложеный внесок до Маршалка Сойму.

Камінярскы варштаты на Лемковині 

Лемківскій Ансамбль Пісні і Танця «Кычера» просит до участи в камінярскых варштатах в Лабовій. Акция пройде в рамках третього етапу модернізацийных прац на цмонтери в Лабовій, єдным з найстаршых цмонтерів на Лемковині. Охочы будут мати нагоду навчыти ся працы при пісковци під оком каменяря Шымона Моджеєвского зо Стоваришыня Маґурич. Як підкрисляют орґанізаторы, волонтеры мают запевненый нічліг і ідло, а участ в варштатах то нагода, жебы навязати і новы знаємости. Камінярскы варштаты будут проходити од 27. вересня/септембра до 2. жолтня/октобра.

«Медже змерканьом а свитаньом» – што може ся діяти ночом в лісі? 

Маґурскій Нацийональный Парк просит учеників основных шкіл до участи в конкурсі пн. «Медже змерканьом а свитаньом». Задачом участників єст зрыхтувати працы, котры запрезентуют, што може ся діяти ночом в Парку. Найважнійша єст креативніст і ориґінальніст. Конкурс проходит в трьох віковых катеґориях, для кляс I-III, IV-VI і для кляс VII-VIII. В каждій катеґориі нагородженых буде 9 прац, котры будут пак презентуваны на выставі, яку одкрыют в ден розданя нагорід. Конкурсовы роботы треба слати до 8. листопада/новембра тр. на адрес Едукацийно-Музейного Осередка в Крампній.

фот. Sądeczanin