Сумар дня на 20. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 20. вересня/септембра 2021 р.

На стрічу Державной Службы Украіны з етнополітикы і свободы совісти з нацийональныма меншынами не были прошены Русины

Як інформувало Закарпатскє Крайове Общество Чешской Культуры, 14. вересня/септембра тр. в ужгородскым Центрі Культур Нацийональных Меншын Закарпатя одбыл ся нацийональный округлый стіл. Была то стріча делеґациі Державной Службы Украіны з етнополітикы і свободы совісти з лідерами громадяньскых орґанізаций ромской, словацкой і чешской нацийональных меншын. Вчас стрічы бесідувало ся м.ін. о реализациі державной політикы в обшыри меджеетнічных односин і охороны прав нацийональных меншын, захованя і розвитку самобытности, заспокоіня іх культурных, языковых і інформацийных потреб. На стрічу не были запрошены ниякы представникы русиньской нацийональой меншыны. Хоц Русины не сут вызнаны украіньском державом, то од 2017 р. мают статус нацийональной меншыны в закарпатскій области. Русины історично становили більшіст населіня той области, єднак доднес мусят ся бороти о свій статис нацийональной меншыны на Украіні.

Новый проґрам по русиньскы в RTVS

Радийо і Телевізия Словациі (RTVS) пошырює од понеділька, 20. вересня/септембра тр., телевізийне нацийональне высыланя на проґрамі Dvojka. Высыланя в єденадцетьох языках про 13 нацийональных меншын мінит час высыланя, а прибудут і два новы проґрамы. На каждый робочый ден од 8.00 до 9.00 год. є заплянуваный новый блок нацийонального высыланя. В віторкы будут проґрамы про русиньску і украіньску меншыны. Раз на місяц буде мож позерати дискусийну реляцию з общественного і політичного жытя. В тым році будут они реализуваны лем в мадярскым і ромскым языках, а в слідуючым мают быти реализуваны і по русиньскы.

Кашебска етнофілолоґія буде урухомлена і в тым році

І в тым році на Ґданьскым Університеті буде одкрыта Кашебска Етнофілолоґія. Тот барз важный для кашебской меншыны напрям часто боре ся з за малым чыслом кандидатів, был аж і завішеный. В липци/юлию тр. не повело ся зобрати мінімального чысла 25 зголошынь. Єднак по выдолженым наборі вказало ся, же охочых єст двараз веце як мінімальне чысло. За Проректором до справ Студентів і Якости Вчыня – Арнольдом Клончыньскым, і кєд част кандидатів не потвердит свойого зголошыня, кашебска етнофілолоґія буде в тым році урухомлена.

Выстава творів Зузаны Осавчуковой в Музею Русиньской Культуры

Словацкій Нацийональный Музей – Музей Русиньской Культуры в Пряшові просит на вернісаж выставы русиньской маларкы Зузаны Осавчуковой пн. «Дорога ґу ціли». Выстава єст реализувана з нагоды подаруваня творів авторкы єй мужом до збіркового фонду музею. В творчости Осавчуковой домінуют пейзаж, пастелі і олійовы фарбы, малювала она закутины, букєты квітя і портреты. Вернісаж выставы одбуде ся в четвер, 23. вересня/септембра, о 16.00 год. Буде єй мож обзерати до 30. вересня/септембра.