«Слово» – 13-та неділя по Сошествії Святого Духа – неділя, 9.00 год.

Образный приклад о робітниках у винограді говорить з єдного боку о великій Божій любви, о великій старостливости о чоловіка. Як Бог вшытко приготовив.

А з другого боку указує на одповідь чоловіка в невдячности, злобі, нелюбви. Ісус ту выображує в тім образнім прикладі Небесне Царьство подобне чоловікови, котрый высадив виноград.

Приготовив вшытко і аж так передав робітникам і одышов. Робітникы намісто того, жебы передавати посланым рабам із плодів, зачали поступати як властникы винограду. Убивали, зневажовали рабів посланых од пана винограду. Не мають почливости ани ку його сынови, але іщі веце їх то мотівує здобыти про себе виноград. А так і зробили – вывели з винограду і убили. Пан винограду як прийде, што зробить? Підлых із гнівом убє а передасть виноград іншым.

Тото можеме видіти в цілій історії – бунт чоловіка проти Бога. Узурпованя чести, котра належыть Богу. А Бог тото стерпів до даякого часу. Жебы дати можность покаяня. Но люде на то не дбають. Тото затриманя кары давать якбы людям потверджіня, же они суть правы. Же так уж буде навсе. Но Євангеліє закінчує: Прийде Господь і каждому одплатить. Вірным рабам словами – подь до радости свого пана. А підлым? Тых із гнівом убє – ідьте од мене прокляты…

Най і тото слово нас напоминать, жебы сьме перебывали у вірности Господу, жебы так чути слова: Добрі вірный рабе і добрый… А не чуьи слова: Ідь од мене проклятый до вічного огня. Слава Ісусу Хрісту!

В неділю, 19. септембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. септембра о 12.00 год. і 20. септембра о 2.00 год. за русиньскым часом.