Народностный округлый стіл без Русинів

Як інформовало Закарпатьске крайове общество чеськой културы, 14-го септембра 2021-го року в конференчній салі ужгородьского Центра култур народностных меншын Закарпатя одбыв ся народностный округлый стіл.

Была то стріча делеґації Державной службы Україны з етнополітікы і слободы совісти, котра была на навщіві Закарпатьской области, з лідерами гражданьскых орґанізацій ромской, словацькой і чеськой народностной меншыны.

На стрічу Русинів не запросили

„Почас події были обговорены вопросы што до реалізації державной політікы в области меджіетнічных односин і охороны прав народностных меншын, захованя і розвитку самобытности, успокоїня їх културных, языковых і інформачных потреб,“ інформовало Закарпатьске крайове общество чеськой културы.

Дале ся мало бісідовати і о розвитку етнічной самобытности народностных меншын, о зміцніню меджінародностного порозуміня, о языково-освітній діялности ці публічных актівностях здружінь, котры представлюють в Закарпатьскій области народностны меншыны.

На стрічу не были запрошены жадны представителі русиньской народностной меншыны. Як інформовало нашу редакцію неменоване жрідло, все, кедь ся такы події орґанізують, Русины покликаны не суть.

Хоць на цілодержавній уровни Русины на Україні признаны не суть, треба підкреслити, же Русины мають статус народностной меншыны в Закарпатьскій области. Тот статус быв схваленый Закрпатськов областнов радов іщі у 2007-ім році. В области діють русиньскы орґанізації, діє там і Народна рада Русинів Закарпатя, до котрой складу векшына орґанізацій входить.

Є зато вопросом, чом державна інштітуція, котра має в назві етнополітіку і слободу совісти, не покликала на таку стрічу і представителів меншыны, яка была історічно майорітным населіньом той области, і котра доднесь мусить бороти ся за свій статус народностной меншыны на Україні. Права меншын суть притім ґарантованы україньсков конштітуційов і далшыма меджінародныма договорами, котрых є Україна сіґнатарьом.

Охранця прав меншын

Державна служба Україны з етнополітікы і слободы совісти є доста новым державным орґаном, котрый быв реґістрованый лем в марці 2020-го року на основі рішіня україньского кабінету міністрів з юна 2019-го року.

Діялность має быти прямована на меджінародностны односины, реліґії і охорону прав народностных меншын на Україні. Притримовати ся при тій роботі має тота державна служба Конштітуції Україны і україньскых законів, наряджінь презідента ці рішінь Верьховной рады Україны.

Жрідло фотоґрафії: Закарпатьске крайове общество чеськой културы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА