Ближыт ся засіданя СКУтНіЕМ

В найблизшу середу, 8. вересня/септембра, одбуде ся дальше, LXXIV засіданя Спільной Комісиі Уряду та Нацийональных і Етнічных Меншын.

В проґрамі засіданя є м.ін. вручыня покликань для новых членів Комісиі та справы повязаны з тырваючым фурт Нацийональным Повселюдным Списуваньом. Не знатя, ци вчас стрічы буде порушена тема новелизациі Кодексу адміністрацийного поступуваня і справ дотуляючых звороту лемківскых лісів.

Формальности, буджет

Перша з осінніх стріч представників поєдных нацийональных і етнічных меншын та репрезентантів уряду влады посвячена буде в першій черзі формальным справам повязаным з переданьом номінаций до складу СКУтНіЕМ єй новым членам.

Дальше ведена має быти дискусия на тему высокости ґрантів в буджеті державы на 2022 р. на задачы повязаны з розвитком нацийональных і етнічных меншын і іх шторічном діяльністю. В тій части голос має забрати представник Міністерства Внутрішніх Справ і Адміністрациі. Од становиска МВСіА найпевнійше буде залежала дальша дискусия.

Кєд пропонуваны середкы на меншыны будут занижены, направдоподібнійше в тым пункті буде ведена горяча бесіда.

Вчас стрічы будут бесідувати і о участи меншын в Крайовым Пляні Одбудовы. Представникы міністра будут пак презентувати інформацию на тему прац над VIII рапортом тыкаючым ситуациі нацийональных і етнічных меншын та реґіонального языка в Польскій Республиці.

Спис. A што з нашом справом?

Єдном з важнійшых тем того засіданя буде інформация про тырваюче Нацийональне Повселюдне Списуваня. В тій части голос забере представник Головного Статистичного Уряду. Члены побесідуют так само на тему меншыновой освіты.

В проґрамі на конец явила ся част посвячена ріжным інчым справам. Не знатя, ци в тій части репрезентанты лемківской меншыны (Штефан Дудра і Мирослава Копыстяньска) порушат квестию звороту лемківскых лісів і звязаной з тым неґативной поставы польскых власти та Державных Лісів.

З огляду на недавну новелизацию Кодексу адміністрацийного поступуваня стараня ся о зворот зрабуваных лісовых ділянок на Лемковині являт ся неможливым. Справы, якы тырвают, мают быти некінчены і піддаваны ремісиі.