В Будапешті проходить стріча восточных католицькых єпіскопів Европы

Од 5-го до 12-го септембра 2021-го року в столиці Мадярьска проходить Меджінародный євхарістічный конґрес. При тій нагоді од 4-го до 8-го септембра проходить в Будапешті і стріча восточных католицькых єпіскопів Европы.

Як інформовав Пресовый центер Кошыцькой єпархії, стріча восточных католицькых єпіскопів є єднов із супроводных подій євхарістічного конґресу. Стрічі ся реґуларно орґанізують, все на іншім місці, в рамках Рады европскых єпіскопскых конференцій. Темов тогорічной стрічі є Євхарістія і сінодалность.

Участь бере і патріарха

Почас робочіх засідань єпіскопи занимають ся выбраныма аспектами односин меджі тайнов Євхарістії і сінодалностьов, котра є інтеґралнов частьов способу жывота восточных церьквей.

Окрім представителів окремых церьквей на стрічі бере участь і Його Блаженость Юссеф Абсі, мелкітьскый ґрекокатолицькый патріарха Антіохії і цілого Востока, Єрусалима і Александрії, як і кардінал Анґело Баняско, котрый є председом Рады европскых єпіскопскых конференцій.

Стрічу поздравив такой першый день кардінал Петер Ерде, архієпіскоп метрополіта Остригомско-будапештяньской архідієцезы, і архієпіскоп Міхаел Авґуст Блуме, апостольскый нунцій в Мадярьску.

Завершіньом цілой стрічі буде одслужіня торжественной літурґії 8-го септембра, в день праздника Рождества Пресвятой Богородіці за новым календарьом, в Базиліці святого Штефана, котрой головным служытельом буде патріарха Юссеф Абсі.

Стрічі єпіскопів

Перша така стріча восточных католицькых єпіскопів проходила в 1997-ім році якраз в Мадярьску.

Ініціовав то втогдышній префект Конґреґації про восточны церькви Ахілле Сілвестріні з цільом, жебы створити платформу про єпіскопів тых церьквей, котры были засягнуты атеістічным режімом, „жебы могли чімясніше найти свою роль в сучасній Европі і были люблены і узнаваны про свою історію і вірность Церькви і Папови, за што заплатили высоку ціну,“ цітує пресовый центер з приговору кардінала Сілвестріні на першій стрічі.

Реґуларны шторічны стрічі єпіскопів восточных католицькых церьквей Европы орґанізують ся од 2005-го року. Од 2009-го року суть під покровительством Рады европскых єпіскопскых конференцій.

Жрідло фотоґрафії: Magyar kurír – Katolikus hírportál.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА