Сумар дня на 25. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2021 р.

Митрополита перемышльско-варшавскій Євген Попович проповідал в Лютині

В днях 21. і 22. серпня/авґуста того рока в найвекшым путницкым місци грекокатоликів на Словациі – в Лютині, одбыл ся архієпархіяльный одпуст. Тогорічный был святкуваный з нагоды 170. річниці зъявліня св. Николая бідній лютиньскій вдові Зузані Фекете. Головным служытельом архієрейской літургіі был пряшівскій архієпископ митрополита Йоан Бабяк. Проповід мал архієпископ митрополита перемышльско-варшавскій Євген Попович, якій бесідувал і про візиту папы рисмкого Франциска в Пряшові. З пандемічных причын і тот рік одпуст проходил лем на реґіональным рівни.

Торжество в Ґорлицях

Для православных вірных ближыт ся праздник в памят лемківского священномученика Максима Ґорлицкого. Катедральна церков св. Тройці в Ґорлицях опубликувала на своім профіли на сайті Facebook офіцийне запрошыня до участи в торжественных богослужынях. Будут они проходити традицийні 5. і 6. вересня/септембра в ґорлицкій церкви. В неділю, 5. вересня/септембра, о 18.00 год. буде служена Всеночна, ана другій ден служены будут дві літургіі: перша уж о 6.00 год. рано, а друга о 10.00 год. Акафист перед мощами св. Максима служеный буде о год. 8.30.

KGHM высоко в ранкінґах

KGHM нашол ся на семым місци в престіжным списі найвекшых продуцентів міди. Ранкінґ зрыхтувал порталь посвяченый інвесторам kitco.com. Kitco підсумувало роботу десятьох найвекшых гірничых фірм на світі на основі результатів тыкаючых продукциі міди в першій чвертці того рока. Продукция платной міди в Капіталовій Ґрупі KGHM протягом шестьох місяців то аж 381 тисячів тон. Зас продукция платной міди в KGHM Польскя Мід С.А. звекшыла ся о 4,4 проц. порівнуючы до аналоґічного періоду в 2020 році і вынесла 293 тис. тон. В квітни/апріли того рока, в інчым ранкінґу зрыхтуваным kitco.com, KGHM узнали за найвекшу копальню срібра на світі за 2020 рік.

Неодола святкуваня Бурсаків

Уж о два тыжні, в четвер – 9. вересня/септембра, на ґорлицкым рынку пройде вынятковый концерт, вынятковый зато, што буде то празднуваня 30. річниці реактивациі Стоваришыня «Руска Бурса» в Ґорлицях. В проґрамі подіі є выступ дітячой ґрупы Терочка та ансамблю ПУНА з Пряшова, єдиного в світі професийного ансамблю, якій занимат ся презентуваньом русиньского фольклору. Важным пунктом концерту буде вручыня посмертні признаного Богданови Ґамбальови, вельолітньому ведучому Руской Бурсы і єдному з ініцияторів реактивациі орґанізациі, Золотого Креста Заслугы – одзначыня признаване є президентом Польской Республикы. Концерт зачне ся о 16.00 год. Вступне дармо. В разі дощу концерт одбуде ся в Ґорлицкым Центрі Культуры. Сердечні просиме.