В Габурі проходить скулпторьскый сімпозій

Од 25-го авґуста до 4-го септембра проходить в Габурі 3-ій річник Скулпторського сімпозіюма Олены Мандіч – Шіналі. Головным орґанізатором є Фундація Деревяна церьковця Габура.

На тогорічный сімпозіюм позваня творити приняло дванадцять скулпторів, з того двоми з Чеськой републікы.

„На тогорічнім скулпторьскім сімпозіюмі будеме дорабляти минулорічных старославяньскых богів і тему світа воды. Прибыли нам приповідковы фіґуркы Дідка Вечернічка, котры реалізуєме у співпраці з RTVS (державне публічне телерадіо, позн. редакції), про проєкт у Новоселіці,“ інформує орґанізатор.

Сімпозій є одркытый і про навщівників, на котрых в окремых днях чекать културный проґрам.

Олена Мандіч – Шіналі

Олена Мандіч, з дому Шіналі (рр. 1902 – 1975), народила ся в Джюлешті, днесь теріторія Румунії. В меджівойновім періоді належала меджі найвызначнішых скулпторів у Чехословакії, доднесь є найвызначнішов русиньсков скулпторков.

Робила і памятник Томаша Ґаріка Масаріка, чехословацького презідента, котрый їй сам пришов робити модел до ательєру. Вытворила і скулптуры ці бусты русиньскых будителів. Памятник Александра Духновіча в Пряшові так само вышов спід їй рук.

Вєдно із зачатьом ІІ. світовой войны закінчіла ся творча діялность Олены Мандіч. Войновы рокы пережыла з родинов у Мукачові, пак в Будапешті. Довгорічный ревматізм їй знеможнив далше робити на скулптурах і остатніх 30 років пережыла в Кошыцях, де робила урядничку і продавачку.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА