Сумар дня на 26. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2021 р.

Неодолга ХVI Світовый Конґрес Русинів

Ближыт ся ХVI Світовый Конґрес Русинів. Припоминаме, што того рока одбуде ся він в днях 10.-11. вересня/септембра на Лемковині. Місцьом засіданя Конґресу буде Крениця, а орґанізатором і ґаздом Стоваришыня Лемків. Конґрес буде мал за задачу м.ін. выбрати нову Світову Раду Русинів і єй ведучого. Окрем того будут проходити бесіды тыкаючы актуальных проблемів русиньской спільноты з цілого світа і вызовів, якы стоят перед Русинами в найблизшых роках. В рамках Конґресу одбудут ся і культурны подіі, такы як выставы ци концерты.

Протесты в Устю Рускым

Вертаме іщы до темы ремонту мосту в Устю Рускым. В остатніх днях одбывали ся гын протесты жытелів, якы не дают згоды ся на тото, жебы не был там зорґанізуваный обізд. При мості зобрало ся вельох мешканців, але так само представникы уряду ґміны. За ремонт мосту одповідат ґорлицкє староство, но люде думают, же то ґміна повинна неґоциювати зо староством, жебы был зробленый додатковый переізд. Як заповіл війт Устя Руского, Збіґнєв Людвін, на понедільок є догварена стріча представників ґміны зо староством. Кєд не буде зробленый переізд при ремонтованым мості, одтятых од Устя буде такой 10 сел.

Русины мают азбуку Брайля

Як інформувало нашу редакцию Общество Русиньской Літературы (Rusyn Literature Society), створена была перша азбука Брайля про русиньскій язык. Головным творцьом є Гарріс Мовбрі, котрый за послідній рік стал знаный як автор Брайльовых азбук про меншыновы славяньскы языкы, як наприклад кашебскій або лужыцко-сербскій. При створіню азбукы помагали і члены общества, русиньскій редактор Томаш Калинич і публициста Михал Лыжечко. Творці думали на вшыткы вариянты русиньского языка в кіриличній і латиньскій подобі. Перепис до Брайльового писма є основаный на медженародных стандардах.

Свято Руской Бурсы на ґорлицкым рынку

Уж о два тыжні, в четвер – 9. вересня/септембра, на ґорлицкым рынку пройде вынятковый концерт. Вынятковый зато, што буде то празднуваня 30. річниці реактивациі Стоваришыня «Руска Бурса» в Ґорлицях. В проґрамі подіі є выступ дітячой ґрупы Терочка та ансамблю ПУНА з Пряшова, єдиного в світі професийного ансамблю, якій занимат ся презентуваньом русиньского фольклору. Важным пунктом концерту буде вручыня посмертні признаного Богданови Ґамбальови, вельолітньому ведучому Руской Бурсы і єдному з ініцияторів реактивациі орґанізациі, Золотого Креста Заслугы – одзначыня признаване є президентом Польской Республикы. Концерт зачне ся о 16.00 год. Вступне дармо. В разі дощу концерт одбуде ся в Ґорлицкым Центрі Культуры. Сердечні просиме!