Вышній Зепмлін буде частьов турістічной значкы Carpathia. Будуть там і самосправы з Підкарпатьского воєводства а Закарпатьской области

Културный і природный потенціал реґіону вышнього Земпліна, єднако як скушености з черезгранічныма проєктами были причіны, чом выникнув в рамках проєкту меджінародной турістічной значкы Carpathia субреґіон Kremenaros.

Як інфомрує аґентура TASR, до субреґіону названім по тригранічнім пункті Кременець, котрый ся находить на верьху в Полонинах з єднаков назвов, і до якого суть в рамках проєкту залучены окресы Снина, Гуменне, Меджілабірці і три польскы а україньскы самосправы, бы мали першы турісты з Кітаю і Швейцарії прийти уж за два рокы.

Хотять цілосвітову значку

За словами Давіда Ласека, ґенералного секретаря Еврореґіону Карпаты і польского шефа рады експертів од турістікы має быти до десятьох років Carpathia цілосвітово знамов значков.

„Не іде нам о то, пропаґовати Підкарпатьске воєводство, Закарпатьску область ці Пряшівскый самосправный край, іде о то творити єднотну карпатьску значку,“ повів Ласек з тым, же цільом проєкту є вытворити сполочну стратеґію на розвиток турістічного руху в областях з „величезным“ потенціалом і єдночасно дати простор самосправам, жебы в рамках меджінародных дотачных схем реалізовали проєкты, котры тот турістічный потенціал підпорять.

Ідея значкы Carpathia пришла із Швейцарії, де про ню фаховці з інштітуту турізму зробили і стратеґію. Офіціалный розмір їй дав договор Еврокарпатьского реґіону і прикликаных країн Сербії і Чеськой републікы. Коордінатором є того часу Польща.

Автентічность і мултікултура

Значка Carpathia має давати автентічность, мултікултураліту, природу, покій, місце, де може быти чоловік самым собов.

Як пояснив Ласек, продуктами турістічного руху в рамках сполочной значкы можуть быти самы субреґіоны, але і конкретны тематічны зажыткы, дика природа, културны памяткы UNESCO, сыры ці вино.

Окрім субреґіону Kremenaros, котрый має быти первістнов „лабораторійов“ наставліня фунґованя далшых субреґіонів, выникнув на северовыходнім пригранічу Словакії подобный реґіон, до котрого на словацькім боці залучіли ся окресы Свідник, Бардейов і Стропків. „Маєме то приготовлене, будеме творити штруктуры, стратеґії, в котрых будеме дефіновати, што хочеме фінанцовати,“ додав Ласек.

Жебы Карпаты были як Алпы

„Думам, же то знать помочі якостнішым службам у нас на Словакії, єднако і якостнішому жывоту жытелів на нашій теріторії,“ оцінила намагы о меджінародну стратеґію пріматорка Снины Даніела Ґаландова.

Ґаландова думать, же є выгодов, же актівность того часу коордінує Польща, бо є в рамках бывшого выходного блоку лідером у турістічнім русі. Од проєкту очекує нелем добудованя інфраштруктуры, обнову културных памяток ці енвіроменталны актівности, але і „выбудованя капаціты містных людей, жебы знали, же тото залучіня під значку Carpathia буде про них значіти тырвалый заробіток“.

„Візія, жебы Карпаты были як Алпы є може на першый погляд як з країны снів, але свойов актівностьов можеме досягнути, жебы то так в будучности досправды было,“ повів першый підпредседа Здружіня міст і сел Словакії Радомір Быртань. Подля Быртаня актівности значкы Carpathia можуть помочі залученым реґіонам соціално і економічно.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА