Ґрекокатолици зачали 40-дньову приправу перед стрічов з Папом

6-го австуста 2021-го року, на праздник Преображенія за ґриґоріяньскым календарьом, вступили ґрекокатолицькы віруючі на Словакії до духовной приправы перед навщівов Святішого Отця Франціска в Пряшові.

Як інформовав Михал Павлишіновіч, говорця Пряшівской архієпархії, пиправа буде тырвати точно 40 днів, кедьже Папа одслужыть Божеску літурґію св. Йоана Златоустого в Пряшові на праздник Воздвиженія Честного Креста, дня 14-го септембра.

Ку зачатку духовной приправы выдали єпіскопи Рады єрархів Ґрекокатолицькой церькви на Словакії пастырьске писмо, котре ся на праздник Преображенія чітало у вшыткых ґрекокатолицькых храмах на Словакії.

40 днів як перед великыма праздниками

Як підкреслив Павлишіновіч, восточны церькви на вызначны праздникы літурґічного рока приготовлюють ся якраз 40-дньовым періодом молитвы і посту. Ці іде о Святу велику чотыридесятніцю перед Пасхов, або о Філіповку перед Рождеством.

„Тота сімболіка 40-дньовой молитвенной пути аж ку стрічі з наслідником апостола Петра зачінать якраз на праздник Преображенія, котрым сьме вшыткы покликаны дашто змінити у своїм жывоті,“ інформує архієпархія.

Любомір Петрик, протосінкел Пряшівской архієпархії і головный коордінатор приправ навщівы Папы римского Франціска в Пряшові інформовав, же Ґрекокатолицька церьков ся окрім свойой духовной приправы залучіть і до цілословацькой духовной приправы, котра буде завершена 15-го септембра, на праздник Сімстрастной Дівы Марії, покровителькы Словакії, коли буде Вселеньскый Архієрей в Шаштіні.

Історічна подія

Віруючі собі на офіціалнім сайті Пряшівской ґрекокатолицькой архієпархії можуть стягнути і брожуру, котра была з той нагоды выдана.

„Брожуру вам пропонуєме як проводника духовнов приправов на історічну навщіву Святішого Отця Франціска в Пряшові, в рамках котрой буде на праздник Воздвиженія Честного і Жывотворящого Креста 14-го септембра головным служытельом Божеской літурґії нашого отця святого Йоана Златоустого, на котрій буде мати проповідь. Нич векше як служіня святой літурґії про нас в духовнім жывоті не єствує. Нич веце, што бы Святішый Отець міг з нами торжествовати, не познаме. Зато бідідуєме о історічній і може неповторятельній події,“ повів Петрик.

У брожурі суть приговоры вшыткы трьох єрархів Ґрекокатолицькой церькви на Словакії, пряшівского архієпіскопа метрополіты Йоана Бабяка, кошыцького єпархы архієпіскопа Кіріла Василя і братіславского єпархы владыкы Петра Руснака. Так само обсягує пастырьске писмо, різны катехезы, молитвы акфістів ку Клокочівскій Пресвятій Богородіці і ку сятому Йосифови.

Папа навщівить штири міста

Папа Франціск почас свойой навщівы Словакії в днях 12-го аж 15-го септембра навщівить Братіславу, Кошыці, Пряшів і Шаштін.

Стрітить ся з трьома найвысшыма конштітучныма діятелями, з представителями хрістіаньскых церьквей, з представителями Жыдівской реліґійной общіны, ці з ромсков комунітов. В Пряшові буде мати стрічу з ґрекокатоликами, де одслужыть літурґію і буде проповідати.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА