Виноватого за пожар церькви в Празі не нашли. Припад одложыли

Чеська поліція не нашла виноватого за пожар, котрый 28-го октобра 2020-го року на державне свято основаня Чехословацькой републікы зничів русиньску деревяну Церьков св. Михаіла Архістратига в Празі.

Як інформовала аґентура ČTK, за словами поліцайного говорцю Яна Рібаньского поліція припад зачатком юла одложыла. Деревяна церьков, котра была народнов културнов памятков із 17-го столітя, стояла в Загороді Кіньскых в Празі і в остатніх. Роках служыла Православній церькви. Поліція вылучіла технічну причіну, скоріше ся бісідує о „людьскій хыбі“.

Храм хотять обновити

Пражскый маґістрат в януарі вырішыв закрыти тото, што зістало з церькви провізорнов конштрукційов, котра має хоронити будову перед кліматічныма впливами два рокы, покля буде готова реконштрукція памяткы.

Подля представителів пражского маґістрату буде мож велику часть храму оправити. Огень найгірше засягнув три турні церькви, храм так само зістав без великой части стріхы. Пожар розшырив ся головно з вонкашньой стороны церькви, внутрі горіло лем на дакотрых місцях. На обновліня памяткы місто Прага зрядило публічну збірку.

Церьков святого Михаіла Архістратига

Церьков святого Михаіла Архістратига быв памятково хороненый обєкт, походив оріґінално із села Великы Лучкы на Підкарпатьскій Руси. До Прагы го перенесли в році 1929, почас 1-ой Чехословацькой републікы, жебы став частьов збірок Народописного музея.

Храм быв збудованый в бойківскім штілі з елементами народного барока. Найвысша вежа мала понад 17 метрів. В інтерьєрі были хосновавы тіпічны фарбы – біла, зелена і червена.

Церьков была комплетно розобрана, перенесена і пак знова поставлена до первістной подобы двараз. В році 1793 єй жытелі Великых Лучок продали векшому і богатшому селу – Медведівцям. Ку другому перенесіню дішло в році 1929 до Прагы.

Зачатком 2008-го року здобыла деревяну церьков до хоснованя Православна церьков в чеськых землях і на Словакії, респектівно Румуньска православна церьков. Кажду неділю і понедільок там одправляли ся богослужіня.

Фото: Pražský deník.cz

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА