«Слово» – 6-та неділя по Сошествії Святого Духа – неділя, 9.00 год.

Слово днешнього євангелія нам говорить о выздравліню невладного чоловіка. Ісус пришов до Капернаума. Коли быв в домі і учів, принесли невладного.

Несло го четверо мужів, но про народ не могли прийти ку Ісусови, прото выходять на стріху, пробили діру і спущають його перед Ісуса. А Ісус видячі їх віру говорить невладному: Одпущають ся тобі гріхы.

Тоты люде може чули, може были свідками даякого выздравліня перед тым, а так приношають з великов віров того невладного. Но реакція Ісуса є інша. Они чекали, же Ісус повість: Встань, будь здравый. Але Ісус говорить о одпущіню гріхів. І фарізеї з учітелями закона, котры там были реаґовали на тото у своїх думках: хто то є, же сі доволить таке повісти. Тадь зневажать Бога. Но Ісус і ту одкрывать своє божество, указує познаня людьского сердця. Він знать о чім они роздумуять і говорить їм: Чом так плано роздумуєте у своїх сердцях?

Ісус знав, што ся находило і в сердці того невладного. Они виділи лем ту вонкашню хвороту. Ісус видів, же він терпів і у своїм сердці рабством гріха. Прото наперед выздравлять його душу а аж так тіло словами, жебы вы знали, же Сын чоловіка мать міць одпущати гріхы: Встань возьмий свою постіль а ідь. А невладный такой так зробив.

Тото днешнє слово і нам говорить, же самоперше треба дбати о безсмертну душу. Коли она є невладна через гріх, приношати єй ку Хрістови. Ісус не говорить о тім, якы были гріхы того чоловіка. А так і мы, коли з віров приступиме ку ньому, він з великов радостьов і нам повість тоты слова: Довіряй, одпущають ся тобі гріхы. Слава Ісусу Хрісту!

В неділю, 1. авґуста 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. авґуста о 12.00 год. і 2. авґуста о 2.00 год. за русиньскым часом.