Сумар дня на 26. липця/юлия 2021 р.

Приносиме вам сумар медияльной ґрупы ЛЕМ.фм+ на ден 26. липця/юлия 2021 р.

Мосты Старосты 2021

В пятницю, 23. липця/юлия, в Ґалериі Штукы Двір Карвациянів в Ґорлицях заслужены для ґорлицкого повіту люде культуры, штукы і охороны нацийональной спадковины были выріжнены нагородом Мосты Старосты 2021. Як бесідувала на ґали старостка Ґорлиц, Мария Ґубала, нагорода тота має символичный вымір, інтеґруюгый ролю культуры понад поділами і єдночасно тырвалый звязок творців з іх малом отчызном. В тым році окрем двох головных нагорід признано і штырі выріжніня. Медже выріжненыма нашол ся Мирослав Трохановскій, за промоцию лемківской культуры і особливе мастерство в писаню ікон. Мирослав Трохановскій родил ся в 1977 р. в Ґлоґові. З західніх земель вернул з родичами на Лемковину, до села Білянка. 20 років был активным членом Ансамблю Пісні і Танця «Лемковина». Разом з Анном Баранович і Лідийом Трохановском основали Працовню Ікон «Мандиліон». Была она в моменті основаня прекурсором одновліня традициі писаня ікон на Лемковині.

Модернізация дворців в Долині Попраду

Неодолга рушыт заповіданый Польскыма Державныма Желізницями (PKP) ремонт дворців в Долині Попраду. На списі обєктів до модернізациі нашли ся стациі в Барціцах, Пивничній, Рытрі, Верхомли, Жеґєстові, Старым Санчы, Ломници, Млодові, Милику і Зубрику. Як повіл для порталю sądeczanin.info представник пресового бюра PKP Бартломєй Сарна, іде о поправу комфорту і стандарду обслугы подорожных, введіня на дворцях розвязань для неполносправных осіб, проеколоґічных розвязань, поправу безпекы, як тіж достосуваня обєктів до актуальных норм і технічных вымогів. Тепер тырвают роботы над опрацуваньом проєктовых документаций архітектонічном працовньом і рішаны сут адміністрацийны квестиі. Єст уж офіцийне рішыня воєводы малопольского воєвідства о перебудові першого з обєктів в Барціцах. За воєводом Лукашом Кмітом, інвестиция має не лем поправити функцийонуваня околичных жытелів, але і спричынити, же реґіон буде барже атракцийный для туристів, понеже подорожуваня на обшыри Малопольщы буде барже комфортове.

5. Перегляд Творчости Ґорлицкой Молодежы

Містецкій Уряд в Ґорлицях – Выділ Освіты, Культуры і Промоциі, Ґорлицкій Центр Культуры та Молодіжна Рада Міста Ґорлиці просят на 5. Перегляд Творчости Ґорлицкой Молодежы. Подія одбуде ся 1. серпня/авґуста о 15.00 год. на Пленеровій Сцені Осередка Спорту і Рекреациі в Ґорлицях. Конкурс має форму короткой сценічной презентациі і єст направленый на учеників основных і понадосновных шкіл, якы ся находят на обшыри міста Ґорлиці і ґорлицкого повіту, в віку од 10 років. Зголошувати ся до конкурсу мож іщы до середы, 28. липця/юлия. Більше про Перегляд і процедуру зголошынь чытайте на офіцийным вебсайті Ґорлицкого Центру Культуры.

В Ґорлицях зачала ся будова стежкы Singletrack

В Ґорлицях на боці Цмунтерной Горы зачала ся долгождана будова біциґльовой стежкы Singletrack. Будова специяльной стежкы была єдным з проєктів, якы перемогли в голосуваню Громадяньского Буджету Ґорлиц в 2019 році. Опізніня в його реализациі было спричынене скомликуваным формальным процесом, якій мусіл быти завершеный перед початком будовы. Для любителів ізды біциґльом зрыхтуваны сут три трасы: підіздова і дві зъіздовы. На початку підіздовой трасы побудуваный буде спортово-выпочынковый пляц, з лавками і стояками на біциґлі. На трасі любителі адреналіны стрітят ся з ріжныма перешкодами, м.ін. деревяныма лавками, насыпами землі ци скал.