Сумар дня на 22. липця/юлия 2021 р.

Приносиме вам сумар медияльной ґрупы ЛЕМ.фм+ на ден 22. липця/юлия 2021 р.

Што з нашыма лісами?

В віторок, 20. липця/юлия, одбыло ся важне засіданя соймовой Комісиі Нацийональных і Етнічных Меншын, якого головном темом была справа одзыскуваня лемківскых лісів. Окрем представників міністерияльных власти, Державных Лісів і посланців, присутны были і репрезентанты лемківскых інтересів. В засіданю брал участ проф. Штефан Дудра, репрезентант лемківской меншыны в СКУтНіЕМ. Был так само ґорлицкій юриста, радця правный Павел Сокіл, котрый веде вельо справ выселеных Лемків і іх потомных, якы старают ся за зворот забраного нелеґально маєтку. Стоваришыня Лемків і Стоваришыня «Руска Бурса» в Ґорлицях представлял Севериян Косовскій. Од імене ЛАПіТ «Кычера» з Ліґниці присутный был Юрий Стариньскій. Обєднаня Лемків репрезентували Штефан Клапик і Григорий Суханич. Цілю стрічы было выпрацувати розвязаня, жебы Лемкы могли в пошануваню іх громадяньскых прав домагати ся зверніня нелеґально забраных лісовых ділянок. Становиско польскых власти в тій справі єст некорыстне, хоц лемківскы стремліня голосно підпорил посол Громадяньской Коаліциі, Євгеній Чыквін. Про деталі чытайте на нашым портали.

Стріча Русинів і Словаків в Сербіі

В суботу, 17. липця/юлия, одбыла ся в Рускым Керестурі робоча стріча, в котрій брали участ представникы Нацийонального Совіту Словаків і Нацийонального Совіту Русинів в Сербіі. На стрічы были підписаны русиньска і словацка версиі меморандуму о спілпрацы тых двох совітів. Своі досвідчыня представили підпредседа Совіту Словаків Златко Шімак і председа Нацийонального Совіту Русинів Борислав Сакач, як і председы штырьох секций тых двох нацийональных совітів. Участникы стрічы дошли до внеску, же Русины і Словакы то братні народы, якы мают вельо спільного. Оба Совіты хотят в будучым розвивати спілпрацу.

Рафал Кукля нагородженый

Бургомайстер Ґорлиц, Рафал Кукля дальшый раз отримал оцініня «Особовіст рока» ґорлицкого повіту в плебісциті орґанізуваным «Краківском Ґазетом». Нагорода была признана в катеґориі «Політика, самоурядніст і локальна соспільніст». Оцініня было передане в Кракові через Капітулу Конкурсу. В тій самій катеґориі оцінены были не лем люде повязаны з самоурядами, але тіж дальшы. Плебісцит «Краківской Ґазеты» має долгу традицию. Серед нагородженых в попередніх едициях сут м.ін. ноблистка, артисты, творці і люде, якы внесли вельо в розвиток Малопольщы.

Выдайте з нами лемківску кухарску книжку

Припоминаме, што до кінця серпня/авґуста тр. тырват соспільна колекта на печатаня першой лемківской кухарской книжкы. Тото комплексове выдавництво буде поділене на 8 части, м.ін. будут «Стравы з капусты», «Молочны стравы» ци «Стравы з комперями». Разом представленых буде 70 провіреных ориґінальных рецептур, што сут оддзеркаліньом традицийной лемківской кухні. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl і причынити ся до печатаня публикациі, глядайте колекты під назвом: Łemkowskie smaki – wydanie książki kucharskiej. За ініциятиву одповідат Стоваришыня «Руска Бурса» в Ґорлицях.