Сумар дня на 21. липця/юлия 2021 р.

Приносиме вам сумар медияльной ґрупы ЛЕМ.фм+ на ден 21. липця/юлия 2021 р.

Без векшых застережынь по контролі НІК-у

Найвысша Ізба Контролі провірила, ци орґаны публичной адміністрациі правильні реализуют задачы тыкаючы підтримуваня культуровой і языковой достоменности нацийональных і етнічных меншын та ґруп хоснуючых реґіональный язык. В опубликуваным рапорті НІК не ствердила векшых порушынь, але вказала на пару обшыри до поправы, м.ін. в реґістрах тыкаючых меншын веденых Міністром Внутрішніх Справ і Адміністрациі та в Системі Освітовой Інформациі. Контрольом обняты были діяня Міністерств: Внутрішніх Справ і Адміністрациі та Едукациі і Наукы, шестьох воєвідскых урядів, 12 урядів ґмін і 12 шкіл та 6 самоурядовых інституций культуры, в роках 2018-2020. В рапорті подано, што представникы меншын ґенеральні позитивні оцінюют спілпрацу зо сконтролюваныма ґмінами. Векшіст самоурядовых інституций культуры піднимала ограничены діяня для нацийональных меншын. Цілый рапорт доступный є на сайті nik.gov.pl.

Учытель зо Святковы Великой зобрал 7000 лемківскых прислів

Болеслав (Василь) Баволяк, ідучы в сліды свого вітця, ціле жытя списувал приповідкы і приказкы хоснуваны серед Лемків. Головні серед жытелів Святковы Великой, одкале походят, але і з околиці. Робота 50 років звінчена была печатаньом істинной біблиі прислів – є то за справом Выдавництва Жызновскій. Публикация «Лемківскы приповідкы і приказкы зо Святковы Великой і околиц» Болеслава Баволяка як раз вказала ся накладом Выдавництва Жызновскій. Найновше выдавництво то не лем захоплююча збірка лемківскых прислів (є іх поміщеных в книжці аж 7000) хоснуваных в єдным селі, але тіж – як бесідує основатель выдавництва Вєслав Жызновскій – барз цінна колекция документуюча культурову спадковину Лемковины. За редакцию, тлумачыня, фонетичну транскрипцию та транскрипцию прислів з рукописів одповідат Тома Квока. В публикациі схоснували образы авторства Теодора Кузяка. Книга чыслит аж 800 сторін. Мож єй придбати на сайті выдавництва zyznowski.pl.

Споминали на блаженного єпископа Павла Петра Ґойдича

Три округлы річниці повязаны з жытьом блаженного єпископа Павла Петра Ґойдича – 20. річниця выголошыня го за блаженного, 70 років од його одсужыня на дожывотный арешт і 110 років од священьского рукоположыня, припомнула шолтыска села Любовец і Рускы Пекляны Йозефіна Штофова на початку торжества, котре одбыло ся в суботу, 17. липця/юлия, в рідным селі єпископа Ґойдича, в Рускых Пеклянах, недалеко Пряшова. На одпусті брал участ і был головным служытельом владыка Йоан Бабяк, пряшівскій архієпископ і митрополита. Перед початком архієрейской літургіі митрополита запознал вірных з актуальным станом канонізациі блаженного Павла і заохочувал участных, жебы і дальше молили ся за чудо на його приговор. По літругіі і мируваню владыка Йоан посвятил новозбудованый крест, котрый находит ся при вході до села Рускы Пекляны.

Туньше видіти Никыфора з білетом желізниці

Округовый Музей в Новым Санчы бере участ в акциі пн. «Вакацийный потяг до Крениці». Особы, котры вкажут в касі Музею Никыфора білет на потяг на трасі Малопольской Желізниці з Ясла до Крениці, можут видіти експозицию музею за 10 зл. Промоцийна ціна обовязує до 5. вересня/септембра тр.