Сумар дня на 15. липця/юлия 2021 р.

Приносиме вам сумар медияльной ґрупы ЛЕМ.фм+ на ден 15. липця/юлия 2021 р.

41. Лемківска Ватра на Чужыні уж 7. серпня/авґуста

Хоц з пандемійом фурт ся бореме, то поведе ся того рока зорґанізувати Лемківску Ватру на Чужыні. Што правда 41. едиция подіі буде тырвала лем єден ден, пройде в суботу 7. серпня/авґуста, але орґанізатор імпрезы – Стоваришыня Лемків – заповідат, што будут в ній могли брати участ вшыткы, хто лем скорше закупит вступне. З причыны ограничынь на Ватрі буде могло быти пристутных лем 1000 осіб, але орґанізаторы рахуют, што каждый буде міг огріти ся ватряным огньом. Білеты мают быти продаваны через інтернет – сайт выстартує в найблизшых днях. Хто не зможе купити – будут они тіж продаваны в касі ватры, але ціна буде высша. Про детальный проґрам будеме іщы інформувати.

Зливы над Пряшівщыном. Найвеце потерпіла Орябина

Короткій, але інтенсивный дойдж і выбережыня орябиньского потока спричынили в остатній понедільок, же заляло част Старой Любовні на Словациі. Затоплены были будинкы. Під водом нашло ся тіж русиньскє село Орябина, кадыль так само тече орябиньскій потік. Там ситуация была в понедільокове пополудне найгірша. Цілый центр села был без дорогы. Вода зорвала і сельску дорогу, веце хыж было одтятых од світа. В селі было вельо поваленых дерев. Заляло пивниці. Орябина потерпіла, зато хто лем може, спомагат селян добрым духом і фінансово. Зливы проходили і в дальшых реґіонах Пряшівщыны.

Два бескідскы шлякы змінены

Як інформує ґорлицкє одділіня Польского Туристично-Краєзнавчого Товариства, змінены были трасы двох бескідскых шляків. Першый з них то червеный шляк, якій веде з Ізб до Вонтковы (Головный Бескідскый Шляк). Зміны тыкают головно одтинка Бортне – Майдан, де пересунено пут, жебы оминути мочары. Друга траса, яку дакус змінено, то част синього шляку Грибів – Дубів Верх. Змінено трасу в околицях села Конечна. Медже інчыма змінене было тото, што веде він тепер вздолж границі через воєнный цмонтір но. 46 і лучыт ся з жолтым шляком ґу Радоцині. Причыном змін были властительскы споры.