Сумар дня на 13. липця/юлия 2021 р.

Приносиме вам сумар медияльной ґрупы ЛЕМ.фм+ на ден 13. липця/юлия 2021 р.

Нова книжка Славомира Лодзіньского

Наукове выдавництво Scholar презентує нову книжку Славомира Лодзіньского пн. «Етнічны назвы і границі: Додатковы назвы місцевости в меншыновых языках в Польщы». В своій працы автор схоснувал статистичны даны і емпіричны досліджыня, жебы створити комплексову анализу проблему присутности нацийональных і етнічных меншын та іх права до свойой достоменности, якє ся явит м.ін. в офіцийных двоязычных назвах місцевости. Славомир Лодзіньскій зосереджат ся в книжці на німецкій, білорускій, литовскій і кашебскій меншынах. Лучыт політичны і правны методы з социйолоґічныма, нп. в інтервю з властями ґмін, представниками меншын, експертами і політиками. Книжку мож придбати в інтернетовым склепі наукового выдавництва Scholar.

ХХХV Медженародны Фольклористичны Стрічы

В неділю, 11. липця/юлия, зачали ся в Люблині ХХХV Медженародны Фольклористичны Стрічы. Потырвают они іщы лем до заране. В проґрамі чысленны концерты, варштаты народных танців ци кєрмеш народной штукы і ремесла. Музичны выступы проходят каждого дня о 18.00 год. в Концертовій Мушли в Саскій Загороді. Штоденно презентуют ся там ансамблі з Люблина, Кашеб, Ліґници та Лемківскій Ансамбль Пісні і Танця «Кычера». В тій едициі фестівалю польскы ґрупы выступуют нажыво, а заграничны на екрані.Того рока перед публиком запрезентує ся разом 16 ансамблів.

«Оповісти зо Свистового Саду»

Так само од неділі, 11. липця/юлия, в Ґалериі в Мамрошів в Ріпках мож обзерати выставу «Оповісти зо Свистового Саду». Автор образів Ґжеґож Худый бесідує о собі, же єст любительом Низкого Бескіду і Лемковины. Назва выставы бере ся од находячой ся в Ріпках ґаздівкы – Свистового Саду. Близко ней стоіт старый дім, якій містит в собі Ґалерию в Мамрошів і де презентуваны сут акварелі. Выстава потырват лем 6 днів, до пятниці, 16. липця/юлия. Заран, 14. липця/юлия о 19.00 год. одбуде ся єй вернісаж. Темами акварель сут найкрасшы деталі Низкого Бескіду, лемківскы деревяны церкви, горы і сельскы краєвиды.

Вакациі з Бєщадскым Нацийональным Парком

І Бєщадскій Нацийональный Парк зрыхтувал на тот рік вакацийный проґрам для діти і родичів. На «Вакациі 2021 з Бєщадскым Нацийональным Парком – Природа/Пригода під руком» складают ся тригодинны едукацийны занятя з працівником парку для діти і родичів, якы будут проходити в кажду пятницю липця/юлия і серпня/авґуста в Долині Волосатого. Занятя будут тыкати м.ін. локальной лісовой звірины, рослин, екосистему і жытелів Бєщадів. Участникы отримают додатково тереновы мапы, выдавництва і дрібны подаркы. На кажды занятя обовязуют записы.