Фурт ся про вас розвиваме. Нова функцийональніст нашого порталю

Фурт стараме ся розвивати не лем нашы знаня, але так само рыхтуєме про нашых слухачів і чытачів новы можливости. Єдном з такых річы єст нова функцийональніст інформацийного порталю lem.fm.

Певно част з нашых постійных обсерваторів уж спостерегла, што од даякого часу кажду з нашых статій, якы сут публикуваны редакторами ЛЕМ.фм+, мож не лем прочытати (што єст очывидне), але так само одслухати. Є тото за справом нашой редакцийной камараткы, Наталиі Малецкой-Новак.

Наталия, як певно тіж уж знате, од близко двох років рыхтує суботній проґрам – підсумуваня того, што протягом даного остатнього тыжня явило ся як раз на нашым вебсайті. Проґрам під назвом «Перегляд тыжня» звучыт в радию в кажду суботу о 9.00 год. Материял, якій рыхтує Наталия до авдициі, є пак діленый на поєдны части і хоснуваный до того, жебы Вы – нашы чытачы – годны были тіж одслухати дану статю.

Нова функцийональніст то предовшыткым цікава пропозиция про вшыткых, якы не знают чытати кіриличный запис, а якы хочут ся вывчыти лемківского, не лем чытаючы тексты, але головно слухаючы нашого языка.

Заохочаме прото зазерати не лем до свіжых текстів, якы нашы редакторы рыхтуют такой каждый ден, але так само до дакус старшых, якы годны сте уж одслухати, хоснуючы нову функцийональніст єдниного лемківского штоденного інформацийного порталю lem.fm.