Сумар дня на 5. липця/юлия 2021 р.

Приносиме вам сумар медияльной ґрупы ЛЕМ.фм+ на ден 5. липця/юлия 2021 р.

ІХ Конґрес Стоваришыня Лемків

В суботу, 3. липця/юлия, в Ліґници одбыл ся ІХ Конґрес Стоваришыня Лемків. Конґрес рішыл м.ін. о абсолюториі для уступуючого правліня, а так само в його рамках выбраны были ведучый Стоваришыня і новы члены Головного Заряду та Головной Ревізийной Комісиі. На предсідателя СЛ черговый раз был выбраный Андрий Копча. На конґресі бесідувано і о плянах на будуче, м.ін. о потребі перебудуваня проґраму Лемківской Ватры на Чужыні ци орґанізациі дополняюючого курсу учытелів лемківского языка. Підкрислене было і значыня тырваючого Нацийонального Повселюдного Спису і просписовой кампаніі.

На Парковій Горі побудуют Загороду Сил Натуры

В Креници рушыли працы на полудньово-західній страні Парковой Горы. До кінця 2021 р. на обшыри 5 гектарів має там быти побудувана Загорода Сил Натуры. Місце буде мало едукацийный характер, позволит познавати права і явиска, якы рядят натуром. Головну ролю в експозициі будут мати силы землі, воды, огня і повітря. В плянах єст тіж видокова вежа з обсервацийным пунктом, спацеровы алейкы і нове освітліня. Великом атракцийом має быти парк мініятур. В плянах єст 10 обєктів характерных для курорту, з можливістю іх розбудовы і описами в языку Браіля. Інфраструктура буде достосувана для потреб неполносправных осіб. На доізд до Загороды має позволити 450-метрова дорога, при якій побудуваны будут паркінґы. Ціліст має быти комунікацийно повязана зо Здройовым Парком і ул. Еберса.

Суботы з провідником по Команчы

Ґмінный Осередок Культуры в Команчы інформує, што од суботы, 3. липця/юлия, выстартували з новом туристичном офертом пн. «Суботы з провідником по Команчы». Під опіком провідничкы Йоанны Потачек, в кажду суботу липця/юлия і серпня/авґуста єст можливіст одвидіти і познати історию перлин деревяной архітектуры в Команчы, такых як монастыр Сестер Назареток, костел св. Йосифа, грекокатолицка церков Покровы Пресвятой Богородиці і православна церков Покровы Пресвятой Богородиці. Збірка буде проходила в кажду суботу при желізницьовым дворци в Команчы о год. 9.35. Прогулька може быти одкликана з причыны злой хвилі. Час прогулькы то ок 2 годины.

Рутенія нагороджена золотым пасмом

І того рока прошол на Словациі Язык Танця (перше Танцуй, танцуй), значыт загальнодержавный конкурс і перегляд фольклорных і танцювальных ансамблів, якій ся являт найбільшом того рода подійом на Словациі. Того рока участникы мали за задачу прислати орґанізаторам конкурсове награня відео зрыхтуваного проґраму, котре пак оцінило медженародне професийональне жырі. Найліпшы были нагороджены бронзовым, срібным і золотым пасмом. Серед нагородженых золотым пасмом нашол ся проґрам русиньского фолькльорного ансамблю Рутенія, пн. «Земля Обіцяна», якій был переможцьом в катеґориі авторскых сценічных проґрамів. Танцювально-драматична пєса оповідат о долі родин і мало знаній істориі Русинів.