Сумар дня на 1. липця/юлия 2021 р.

Приносиме вам сумар медияльной ґрупы ЛЕМ.фм+ на ден 1. липця/юлия 2021 р.

В суботу ІХ Конґрес СЛ

В найблизшу суботу, 3. липця/юлия, в Ліґници пройде ІХ Конґрес Стоваришыня Лемків. Хоц сеса подія была рыхтувана на квітен/апріль текучого рока, з причыны тырваючых в тамтым часі ограничынь годна ся она одбыти аж тепер. Формально конґрес має за задачу предовшыткым выбрати новы власти Стоваришыня, кєд же по змінах статуту проведеных в 2019 р. каденция начальных власти орґанізациі была скорочена до двох років. Як інформує ведучый СЛ, Андрий Копча, ІХ Конґрес має зачати ся о 11.00 год. Само засіданя буде проходило в гыбридовій формулі, кєд же част делеґатів буде брала в ним участ при схоснуваню інтернету, маючы можливіст кандидуваня і оддаваня важных голосів. Дотепер одбыло ся вісем конґресів, а окрем них і штырі Надзвычайны Конґресы.

Великы зливы над Лемковином

В полудне 29. червця/юнія над Лемковином перешла велика злива, яка спричынила вельо проблемів. Стражакы мусіли інтервеніювати парунадцет разів на обшыри цілого ґорлицкого повіту. Найгірша ситуация была в ґміні Устя Рускє. Великы проблемы были в такых селах як Ганчова, Шквіртне, Реґєтів ци Баниця. Примірово в Ганчовій ріка долшу хвилю ішла дорогом, а сам пут з Ганчовой до Шквіртного был непереіздный. Вода заляла вельо хыж, знищыла тіж много дерев. Коло 19.00 год. над ґорлицкым повітом перешла друга фаля бурі. Тым разом найвеце потерпіла ґміна Ропа, де горіла єдна хыжа, в яку вдарил перун. Ситуация помалы ся стабілизує.

Міст в Санковій запертый

Як інформує Уряд Ґміны в Санковій, од понеділька, 5. липця/юлия 2021 р., запертый буде міст в Санковій, якій єст на воєвідскій дорозі номер 997. То обєкт, якій од долшого часу єст в злым технічным стані, а якій был так само зуженый. Тепер перебудова того мосту, якій лежыт на граници Санковой і Сяр, зяплянувана была через Заряд Воєвідскых Доріг в Кракові. В звязку з тым, же міст буде закытый, до диспозициі жытелів буде біциґльово-піша лавка недалеко деревяного костела. Авта мусят ходити або дорогом Санкова – Домініковиці, або воєвідском дорогом номер 993.

Нацийональный Совіт Русинів Сербіі стрітил ся з войводиньскыма властями

Покраіньскы (провінцийональны) власти Войводины стрітили ся з представниками Нацийонального Совіту Русинів в Сербіі. Власти репрезентувал предсідатель Ігор Мирович, а Нацийональный Совіт Русинів – його ведучый Борислав Сакач і предсідатель Вывершнього Одбору Желько Ковач. На стрічы была так само присутна директорка Заводу за Культуру Войводиньскых Русинів Анамария Ранкович. Як подає председа влады Мирович, Покраіньска влада Войводины підтримала плян зробити адаптацию просторів для сідибы Заводу за Культуру Войводиньскых Русинів, яка мала бы найти місце в будинку Матиці Сербской, найстаршой сербской літературно-науковой і культурно-освітньой орґанізациі в Сербіі. Сідиба Матиці Сербской є актуально в Новым Саді.