Спиш ся сам, інакше до Тя придут…

Од днес, значыт од середы, 23. червця/юнія 2021 р., рахмайстры зачынают выходити в терен. Кєд сте ся іщы не списали ани через інтернет, ани через телефон – до Вашых двери може задуркати рахмайстер. Інформация про початок безпосереднього списуваня явила ся на сайті Нацийонального Повселюдного Спису Жытелів і Мешкань 2021 передвчера, 21. червця/юнія.

Участ в Нацийональным Повселюдным Списі Жытелів і Мешкань є обовязкова, не мож одмовити передати даны рахмайстрови. Рахмайстры будут контактувати ся з особами, котры не списали ся самы через інтернет або телефонічні. Мают обовязок дати кажде звіданя з формуляря. Не можут напр. автоматичні переписати нацийональности як польска, по поданю польского громадянства – памятайте про тото.

Каждый рахмайстер має ідентифікатор з конкретныма даныма: мено і назвиско особы зо знимком, номер ідентифікатора з голоґрамом, назву і лоґо воєвідского списового бюра, підпис особы, котра є уповажнена видати ідентифікатор, період, на якій ідентифікатор выдали.

Кєд мате вантпливости, можете провірити ідентичніст рахмайстра на сайті списуваня rachmistrz.stat.gov.pl, задзвонити на інфоленію під номер 22 279 99 99 або задзвонити на поліцию і попросити о поміч в верифікациі.

Каждый, хто іщы ся не списал, не мусит ждати на рахмайстра – фурт може тото зробити через інтернет або інфоленію.

Додатково каждый, хто спише ся через інтернет, буде брал участ в лотериі. Лосуваня нагорід є выключні для осіб, котры спишут ся самы через інтернет. Не берут в ним участи особы списаны рахмайстром або списаны телефонічні.