Архієпіскоп Кіріл призначеный до Верьховного трібуналу Апостольской сіґнатуры

Як інформує портал Vatican News, в понедільок 21-го юла 2021-го року Папа римскый Франціск призначів на пятьрічный період членів Верьховного трібуналу Апостольской сіґнатуры.

Меджі дванадцятьома особностями з різных народностей спомеджі кардіналів, архієпіскопів і єпіскопів, є і архієпіскоп Кіріл Василь, апостольскый адміністратор sede plena Кошыцькой ґрекокатолицькой єпархії.

В списку призначеных суть штирьоми кардіналы: Джозеф Вілліам Тобін, архієпіскоп Неварку в США; Джеймс Майкл Гарвей, архісвященик Папской базилікы св. Павла за мурами; Ґергард Людвіґ Міллер, емерітный префект Конґреґації доктріны віры і Маріо Ґрех, ґенералный секретарь Сінода єпіскопів.

Папа Франціск єдночасно призначів і семох референтів Верьховного трібуналу Апостольской сіґнатуры спомеджі академічных фаховців у области канонічного права латиньской церькви і восточных католицькых церьквей.

Верьховный трібунал Апостольской сіґнатуры (Signaturae Apostolicae Tribunal) є єдным із урядів Римской курії, і є верьховным судом а єдночасно так само верьховным орґаном церьковной юстічной справы і справной юстіції Святішого Престола.

Фото: Arcibiskup Cyril Vasiľ / FB.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА