Сумар дня на 17. червця/юнія 2021 р.

Приносиме вам сумар медияльной ґрупы ЛЕМ.фм+ на ден 17. червця/юнія 2021 р.

Перша річниця смерти Богдана Ґамбаля

2. липця/юлия 2021 р. выпадат перша річниця смерти Богдана Ґамбаля (1965-2020), выдатного лемківского діяча, реактиватора ґорлицкой Руской Бурсы і основателя першого лемківского радия ЛЕМ.фм. Хочеме молитовно спомнути на нашого камарата, ідеового товариша вельох люди одданых нашій справі, щырого і доброго чловека. Прото заявляме, што в суботу, 3. липця/юлия, о год. 11.30 просиме до участи в молитвах за душу Усопшого, якы будут правлены в місци близкым каждому з нас – в каплици на св. Горі Явір над Высовом. Богослужыня очелит грекокатолицкій священник о. Ярослав Чухта. Служены будут Божеска Літургія, пак Панахіда. Вічная Памят!

Папа римскій принял делеґацию Мукачівской Грекокатолицкой Церкви

На авдиєнциі, котра проходила в Ватикані вчера, 16. червця/юнія, была присутна і делеґация з Мукачівской Грекокатолицкой Єпархіі, яку очелил владыка Ніль Лущак, апостольскій адміністратор єпархіі. Як інформувал порталь Vatican News, на кінци стрічы з поломниками Папа Франциск привитал ся з владыком Нільом, котрому поцілювал Панаґію, і поблагословил ікону Пресвятой Родины з Джублика, котру там поломникы з Мукачівской Єпархіі принесли. Джублик то грекокатолицкє поломницкє місце коло села Нижнє Болотне на Підкарпатскій Руси. Там в 2002 р. коло джерела зъявила ся двом дівчаткам Пречыста Діва. На місци, де одбыли ся зъявіня, была побудувана і літня одпустова церков Непорочного Зачатя Пречыстой Дівы Мариі.

Успіх в списуваню на Словациі

Вчас електронічной і асистуваной (при помочы рахймастрів) формы списувуня жытелів на Словациі списало ся 5,22 млн люди. Цілковито списало ся 92,7% управненых до спису жытелів Словациі. На вітірковій пресовій конференциі о тым інформували представникы Статистичного Уряду Словацкой Республикы. Списуваня жытелів електронічном формом проходило од 15. лютого/фебруара до кінця марця. В ним ся самосписало 86% жытелів. Асистуване списуваня пак проходило од 3. мая і закінчыло ся 13. червця/юнія. Першы результаты мали бы быти публикуваны на Словациі кінцьом 2021 р.

Як то є з мышпергачами в Ізбах?

Як інформує Товариство з Низкого Бескіду та Баба з Гір в днях 1., 8., 13., 22. і 29. липця/юлия одбуде ся тзв. спільне одвиджаня і досліджаня світа мышпергачів. В каждых з тых дни стріча буде зачынала ся о год. 19.30. Подіі будут проходити в селі Ізбы, де находит ся памяткова мурувана церков св. Лукы, на поді котрой жыют мышпергачы. В проґрамі заплянувано одвиджаня храму, анімациі, цікавы задачы і оповіданя про світ мышпергачів. Фіналом каждой стрічы має быти обсервация нічного вылітуваня звірят з церкви. Вступне лем 10 зл.